ന്യൂഡല്‍ഹി: അന്തരാഷ്ട്ര മനുഷ്യാവകാശ സംഘടനയായ ആംനസ്റ്റി ഇന്റര്‍നാഷനല്‍ ഇന്ത്യയിലെ പ്രവര്‍ത്തനം നിര്‍ത്തുന്നു. കേന്ദ്രത്തിന്റെ പ്രതികാര നടപടികളെ തുടര്‍ന്നാണ് തീരുമാനം. 

കേന്ദ്ര സര്‍ക്കാര്‍ തങ്ങളുടെ ബാങ്ക് അക്കൗണ്ടുകള്‍ മരവിപ്പിച്ചെന്നും ഇതു കാരണം ജീവനക്കാരെ പിരിച്ചുവിടാന്‍ തങ്ങള്‍ നിര്‍ബന്ധിതരായെന്നും ആനംസ്റ്റി ചൂണ്ടിക്കാട്ടുന്നു. ഇതുമൂലം സംഘടനയുടെ രാജ്യത്തെ എല്ലാ പ്രവര്‍ത്തനങ്ങളും ക്യാംമ്പയിനുകളും നിര്‍ത്തിവെച്ചതായി ആംനസ്റ്റി ഇറക്കിയ പ്രസ്താവനയില്‍ പറയുന്നു.

' ഞങ്ങള്‍ ഇന്ത്യയില്‍ അഭൂതപൂര്‍വ്വമായ ഒരു സാഹചര്യത്തെ അഭിമുഖീകരിക്കുന്നു. ആംനസ്റ്റി ഇന്റര്‍നാഷണല്‍ ഇന്ത്യയില്‍ വളരെ ആസൂത്രിതമായ രീതിയില്‍ ആക്രമണങ്ങളും ഭീഷണികളും നേരിടുന്നു,' ആനംസ്റ്റി ഇന്ത്യയുടെ റിസേര്‍ച്ച്, അഡ്വക്കസി, പോളിസി ഡയരക്ടര്‍ ശരത് ഖോശ്ല ബി.ബി.സിയോട് പറഞ്ഞു. 

രാജ്യത്തെ മനുഷ്യാവകാശ സംഘടനകളെയെല്ലാം മോദി സര്‍ക്കാര്‍ വേട്ടായാടുകയാണെന്നും അദ്ദേഹം കൂട്ടിച്ചേര്‍ത്തു. 

ഡല്‍ഹി വംശഹത്യയെ കുറിച്ചുള്ള ഞങ്ങളുടെ അന്വേഷണത്തിന്റെ കാര്യത്തിലായാലും ജമ്മുകശ്മീരിലെ ശബ്ദങ്ങളെ അടിച്ചമര്‍ത്തുന്നതിലായാലും ഞങ്ങളുടെ ചോദ്യങ്ങള്‍ക്ക് ഉത്തരം നല്‍കാന്‍ സര്‍ക്കാര്‍ ആഗ്രഹിക്കുന്നില്ലെന്നും അദ്ദേഹം തുറന്നടിച്ചു.

ആഗസ്റ്റ് മാസം ആംനസ്റ്റി ഇന്റര്‍നാഷണല്‍ പുറത്തു വിട്ട റിപ്പോര്‍ട്ടില്‍ ഡല്‍ഹി വംശഹത്യയില്‍ ഡല്‍ഹി പൊലിസ് തന്നെ ക്രൂരമായ മനുഷ്യവകാശ ലംഘനങ്ങള്‍ നടത്തിയെന്ന് ചൂണ്ടിക്കാട്ടിയിരുന്നു. കശ്മീരിന്റെ പ്രത്യേക പദവി എടുത്തു കളഞ്ഞതിന്റെ ഒന്നാ3ം വാര്‍ഷികത്തില്‍ തടവിലാക്കിയ രാഷ്ട്രീയക്കാരെയും മാധ്യമപ്രവര്‍ത്തകരെയും ആക്ടിവിസ്റ്റുകളെയും വിദ്യാര്‍ത്ഥികളെയും  വിട്ടയക്കണമെന്നും ആംനസ്റ്റി ആവശ്യപ്പെട്ടിരുന്നു. എന്നാല്‍ ഇതെല്ലാം കേന്ദ്രം തള്ളിക്കളയുകയാണുണ്ടായത്. 

ഒപ്പം മേഖലയിലെ ഇന്റര്‍നെറ്റ് എടുത്ത് കളഞ്ഞ നടപടിയയെയും വിമര്‍ശിച്ചിരുന്നു. ആനംസ്റ്റിയുടെ ഇപ്പോഴത്തെ വിമര്‍ശനത്തില്‍ സര്‍ക്കാര്‍ ഇതുവരെ പ്രതികരിച്ചിട്ടില്ല.