കുന്ദമംഗലം: കാരന്തൂരിലെ വടക്കുംതലയില്‍ മദ്‌റസയോടനുബന്ധിച്ച് പ്രവര്‍ത്തിക്കുന്ന ദര്‍സില്‍ ഭക്ഷ്യവിഷബാധ. 12 വിദ്യാര്‍ഥികളെയും രണ്ട് അധ്യാപകരെയും ആശുപത്രിയില്‍ പ്രവേശിപ്പിച്ചു. മണ്ടാളില്‍ മര്‍ക്കസ് ഗാര്‍ഡന്‍ എന്നപേരില്‍ പ്രവര്‍ത്തിക്കുന്ന ഖാദിരിയ്യ മദ്‌റസയുടെ ദഅ്‌വ കോളജിലാണ് ഇന്നലെ ഉച്ചയ്ക്ക് ഭക്ഷണം കഴിച്ച വിദ്യാര്‍ഥികള്‍ക്കും അധ്യാപകര്‍ക്കും വിഷബാധയേറ്റത്. പ്ലസ് വണ്‍, പ്ലസ്ടു ക്ലാസുകളിലുള്ള 28 കുട്ടികള്‍ താമസിച്ചു പഠിക്കുന്നുണ്ട്. അടുത്തവീട്ടില്‍ നിന്നാണ് ഭക്ഷണം തയാറാക്കുന്നത്. ഞായറാഴ്ച രാത്രിയിലെ ബാക്കിവന്ന ഭക്ഷണം ഫ്രിഡ്ജില്‍ സൂക്ഷിച്ച് ഇന്നലെ ഉച്ചയ്ക്ക് വീണ്ടും ചൂടാക്കി കഴിച്ചതാണ് വിഷബാധയ്ക്കു കാരണമായതെന്ന് ഇവിടെ തെളിവെടുപ്പ് നടത്തിയ ആരോഗ്യ വകുപ്പ് അധികൃതര്‍ പറഞ്ഞു.
ഹെല്‍ത്ത് ഇന്‍സ്‌പെക്ടര്‍ സി.പി സുരേഷ്, ജെ.എച്ച്.ഐമാരായ സജിത്, ഗിരീഷ്, സനല്‍ എന്നിവരടങ്ങിയ സംഘമാണ് സ്ഥലം സന്ദര്‍ശിച്ചത്. ഇവര്‍ ഭക്ഷണത്തിന്റെ സാമ്പിള്‍ ശേഖരിച്ചിട്ടുണ്ട്.