കണ്ണൂര്‍: അര്‍ധരാത്രിയില്‍ ട്രെയിനിറങ്ങി വീട്ടിലേക്കു പോവുകയായിരുന്ന കേളകം സ്വദേശിയുടെ മൂന്നര പവന്റെ മാല കവര്‍ന്ന കേസില്‍ നാലുപേരെ പൊലിസ് അറസ്റ്റുചെയ്തു. ചാലാട് ജയന്തി അപ്പാര്‍ട്ട്‌മെന്റില്‍ താമസിക്കുന്ന മെഡിക്കല്‍ റപ്രസന്റേറ്റീവ് കേളകം ചെട്ടിയാംപറമ്പ് കാര്‍ത്തികയില്‍ മഹേഷ് എം. നായരുടെ സ്വര്‍ണമാല കവര്‍ന്ന കേസില്‍ ഏച്ചൂര്‍ കമാല്‍പീടികയിലെ പി.സി ദില്‍ഷാദ് (23), കാഞ്ഞിരോട് കാരക്കാട് ആനിയത്ത് വീട്ടില്‍ ജുനൈസ് (29), കുടുക്കിമെട്ട ഹാജിമൊട്ടയിലെ കെ. ഇര്‍ഷാദ് (25), കാഞ്ഞിരോട് പുറവൂരിലെ കെ. അബ്ദുല്‍ നസീര്‍ (34) എന്നിവരെയാണു ടൗണ്‍ എസ്.ഐ ശ്രീജിത്ത് കൊടേരിയും സംഘവും പിടികൂടിയത്. കഴിഞ്ഞ 28ന് രാത്രി 11.30ഓടെയായിരുന്നു കേസിനാസ്പദ സംഭവം. മഹേഷ് ട്രെയിനിറങ്ങി ചാലാട്ടെ അപ്പാര്‍ട്ട്‌മെന്റിലേക്കു പോകുന്നവഴിയാണു ഓംനി വാനിലെത്തിയ സംഘം മാല കവര്‍ന്നത്. ഇവര്‍ സഞ്ചരിച്ച വാനും പൊലിസ് കസ്റ്റഡിയിലെടുത്തു.