തിരുവനന്തപുരം: കഴിഞ്ഞ അരനൂറ്റാണ്ടായി സംഘടിതവും ആസൂത്രിതവുമായ രീതിയില്‍ മലബാര്‍ മേഖലകളില്‍ നടക്കുന്ന കള്ളവോട്ടിനെതിരേ കോണ്‍ഗ്രസും യു.ഡി.എഫും നടത്തിവന്നിരുന്ന ധര്‍മയുദ്ധത്തിന്റെ ആദ്യവിജയമാണ് നാല് ബൂത്തുകളില്‍ റീപോളിങ് നടത്താനുള്ള നടപടിയെന്ന് കെ.പി.സി.സി പ്രസിഡന്റ് മുല്ലപ്പള്ളി രാമചന്ദ്രന്‍.
തെരഞ്ഞെടുപ്പ് കമ്മിഷന്റെ ഈ തീരുമാനത്തെ കെ.പി.സി.സി സ്വാഗതം ചെയ്യുന്നു. റീപോളിങ്ങിന് കേന്ദ്ര തെരഞ്ഞെടുപ്പ് കമ്മിഷനോട് ശുപാര്‍ശ ചെയ്ത മുഖ്യതെരഞ്ഞെടുപ്പ് ഓഫിസറുടെ നടപടിയെ കെ.പി.സി.സി അഭിനന്ദിക്കുന്നു.
തെരഞ്ഞെടുപ്പ് സുതാര്യവും സത്യസന്ധവുമായി നടത്തുന്നതിന് തെരഞ്ഞെടുപ്പ് കമ്മിഷന്റെ കര്‍ശനമായ നടപടികളും ഇടപെടലുകളും ഇനിയും നടത്തേണ്ടതായിട്ടുണ്ടെന്നും മുല്ലപ്പള്ളി പറഞ്ഞു.