ആംസ്റ്റര്‍ഡാം: ചാംപ്യന്‍സ് ലീഗിലെ അപ്രതീക്ഷിത തോല്‍വി ഡച്ച് ലീഗില്‍ മറികടന്ന് അയാക്‌സ്. ലീഗിലെ അവസാന മത്സരത്തില്‍ ഡീ ഗ്രാഫ്ഷാപിനെ പരാജയപ്പെടുത്തിയ അയാക്‌സ് പി.എസ്.വി എയ്‌ന്തോവനെ പിന്തള്ളി ഡച്ച് ലീഗില്‍ ചാംപ്യന്മാരായി.

ഒന്നിനെതിരേ നാല് ഗോളുകള്‍ക്കാണ് അയാക്‌സിന്റെ വിജയം. അയാക്‌സിന് വേണ്ടി ഡുസാന്‍ ടാഡിച്ച് ഇരട്ട ഗോളുകള്‍ നേടി. 67, 87 മിനുട്ടുകളിലാണ് താരം വലകുലുക്കിയത്. ലാസെ ഷോണെ (37), നിക്കോളാസ് തഗ്ലിയാഫികോ (44) എന്നിവരാണ് അയാക്‌സിന് വേണ്ടി മറ്റുഗോളുകള്‍ നേടിയത്. 40ാം മിനുട്ടില്‍ യൂസഫ് എല്‍ ജെബില്‍ ഡീ ഗ്രാഫ്ഷാപിന് വേണ്ടി ആശ്വാസ ഗോള്‍ നേടി. അയാക്‌സിന്റെ 34ാം കിരീടമാണിത്. 2013-14 സീസണിന് ശേഷം അയാക്‌സ് ആദ്യമായാണ് കിരീടം നേടുന്നത്. നേരത്തെ ഡച്ച് കപ്പും നേടിയിരുന്ന അയാക്‌സ് ഇതോടെ സീസണില്‍ ഡബിള്‍ കിരീടം സ്വന്തമാക്കി.
2004-05 സീസണില്‍ പി.എസ്.വി ഡബിള്‍ നേടിയ ശേഷം ആദ്യമായാണ് ഒരു ഡച്ച് ക്ലബ് ഡബിള്‍ കിരീടം നേടുന്നത്. അയാക്‌സിന്റെ എട്ടാമത്തെ ഡബിള്‍ നേട്ടമാണ് ഇത്. അവസാന നാലു സീസണില്‍ മൂന്ന് തവണയും പി.എസ്.വി ആയിരുന്നു ഡച്ച് ലീഗ് നേടിയത്.

ലീഗില്‍ 34 മത്സരങ്ങളില്‍ നിന്ന് 28 ജയവും 2 സമനിലയും നാല് തോല്‍വിയുമടക്കം 86 പോയിന്റാണ് അയാക്‌സിനുള്ളത്. രണ്ടാമതുള്ള എയ്‌ന്തോവന് ഇത്ര തന്നെ മത്സരങ്ങളില്‍ നിന്ന് 26 ജയവും അഞ്ച് സമനിലയും മൂന്ന് തോല്‍വിയുമായി 83 പോയിന്റാണുള്ളത്. ഒന്നും രണ്ടും സ്ഥാനങ്ങളിലുള്ള അയാക്‌സും പി.എസ്.വിയും അടുത്ത ചാംപ്യന്‍സ് ലീഗിന് യോഗ്യത നേടി.