പള്ളിക്കല്‍: പള്ളിക്കല്‍ ഗ്രാമപഞ്ചായത്തിന്റെ ഉടമസ്ഥതയിലുള്ള കരിങ്കല്ലുകള്‍ കടത്തിക്കൊണ്ടുപോയ സംഭവത്തില്‍ കാര്യക്ഷമമായി അന്വേഷിക്കണമെന്നാവശ്യപ്പെട്ട് നാട്ടുകാര്‍ വിജിലന്‍സില്‍ പരാതി നല്‍കി. കഴിഞ്ഞ നാലിനാണ് സംഭവം നടന്നത്. ഗ്രാമപഞ്ചായത്തംഗമായ സി.പി.എം നേതാവ് ഉള്‍പ്പെടെയുള്ള ചിലരുടെ ഒത്താശയിലാണ് പൊതുമുതല്‍ കടത്തി കൊണ്ട് പോയതെന്നാണ് പരാതിയില്‍ പറയുന്നത്. മലപ്പുറം വിജിലന്‍സ് ഡി.വൈ.എസ്പി ക്കും മലപ്പുറം ഡി.ഡി.പി ക്കുമാണ് നാട്ടുകാര്‍ പരാതി നല്‍കിയത്.
ഇതിനിടെ സംഭവം ഒതുക്കി തീര്‍ക്കാനുള്ള ശ്രമം നടന്നു വരുന്നതായും പരാതിയുണ്ട്. ഗ്രാമ പഞ്ചായത്ത് 13-ാം വാര്‍ഡിലെ കുന്നത്ത് പറമ്പ്-മാതാംകുളം റോഡില്‍ നവീകരണം നടത്തുന്നതിനായി നേരത്തെ റോഡിന്റെ ഇരുവശങ്ങളിലായി പാകിയ കരിങ്കല്‍ ബോളറുകള്‍ ഇളക്കി മാറ്റി കൂട്ടിയിട്ടിരുന്നു.
കരിപ്പൂര്‍ ചോലമാട്ടില്‍ സ്വകാര്യ മൊബൈല്‍ ടവര്‍ നിര്‍മ്മാണത്തിനായി ഉപയോഗിക്കുന്നതിനായി പഞ്ചായത്തിന്റെ ഉടമസ്ഥയിലുള്ള കരിങ്കല്ലുകള്‍ കടത്തി കൊണ്ട് പോകുന്നത് ശ്രദ്ധയില്‍പെട്ട നാട്ടുകാര്‍ പൊലിസില്‍ അറിയിച്ചതിനെ തുടര്‍ന്ന് കരിപ്പൂര്‍ പൊലിസെത്തി പ്രവര്‍ത്തി തടയുകയായിരുന്നു. സംഭവം ഒതുക്കി തീര്‍ക്കാനുള്ള ശ്രമം നടന്ന് വരുന്നതിനിടെയാണ് ഇതിന് പിന്നില്‍ പ്രവര്‍ത്തിച്ചവരെ കണ്ടെത്തി നടപടി യെടുക്കണമെന്ന ആവശ്യവുമായി നാട്ടുകാര്‍ രംഗത്തെത്തി വിജിലന്‍സില്‍ പരാതി നല്‍കിയത്.