ന്യൂഡല്‍ഹി: ലോക്‌സഭാ തെരഞ്ഞെടുപ്പ് ഫലം വരാന്‍ ദിവസങ്ങള്‍ മാത്രം ശേഷിക്കെ കേന്ദ്രത്തില്‍ ബിജെപി ഇതര സര്‍ക്കാര്‍ അധികാരത്തില്‍ വരാന്‍ നീക്കങ്ങള്‍ ശക്തമാക്കി ടിഡിപി അധ്യക്ഷനും ആന്ധ്രപ്രദേശ് മുഖ്യമന്ത്രിയുമായ ചന്ദ്രബാബു നായിഡു. ഇതിനായി പ്രതിപക്ഷ നേതാക്കളുമായി കൂടിക്കാഴ്ച നടത്തി വരികയാണ് അദ്ദേഹം.

കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുമായും എന്‍സിപി അധ്യക്ഷന്‍ ശരത് പവാറുമായും നടത്തിയ കൂടിക്കാഴ്ചകള്‍ക്കു പിന്നാലെ എസ്.പി
അധ്യക്ഷന്‍ അഖിലേഷ് യാദവുമായും ബി.എസ്.പി അധ്യക്ഷ മായാവതിയുമായും അദ്ദേഹം കൂടിക്കാഴ്ച നടത്തി.

ബിജെപിക്കെതിരെ നില്‍ക്കുന്ന ഏതൊരു പാര്‍ട്ടിയെയും മഹാസഖ്യത്തിലേക്ക് സ്വാഗതം ചെയ്യുന്നതായി ചന്ദ്രബാബു നായിഡു കഴിഞ്ഞ ദിവസം പറഞ്ഞിരുന്നു.