കൊണ്ടോട്ടി: ഈ വര്‍ഷത്തെ ഖാദിമുല്‍ ഹുജ്ജാജിമാരായി (ഹജ്ജ് വളണ്ടിയര്‍മാര്‍) തിരഞ്ഞെടുത്തവര്‍ക്കുള്ള പ്രത്യേക ദ്വിദിന റസിഡന്‍ഷ്യല്‍ ട്രൈയിനിങ് ക്യാംപ് സമാപിച്ചു. കരിപ്പൂര്‍ ഹജ്ജ് ഹൗസില്‍ ശനിയാഴ്ച ആരംഭിച്ച ക്യാംപ് ഇന്നലെ ഉച്ചയോടെയാണ് സമാപിച്ചത്.
ഹജ്ജ് വളണ്ടിയര്‍മാര്‍ക്ക് ഇത്തവണ രണ്ട് യൂനിഫോം കോട്ടുകള്‍ അനുവദിക്കുമെന്ന് ഹജ്ജ് കമ്മിറ്റി ചെയര്‍മാന്‍ സി. മുഹമ്മദ് ഫൈസി പറഞ്ഞു.കേന്ദ്ര ഹജ്ജ് കമ്മിറ്റി വളണ്ടിയര്‍മാര്‍ക്ക് നല്‍കിയ പരിശീലനത്തിന് പുറമെയാണ് സംസ്ഥാന ഹജ്ജ് കമ്മിറ്റിയുടെ പരിശീലനം. ഹജ്ജ് തീര്‍ഥാടകര്‍ക്ക് നല്‍കേണ്ട സേവനങ്ങളാണ് രണ്ട് ദിവസത്തെ ക്യാംപില്‍ വിശദീകരിച്ചത്.