ന്യൂഡല്‍ഹി: ദിനംപ്രതിയെന്നോണം പാകിസ്താന്‍ വെടിനിര്‍ത്തല്‍ കരാര്‍ ലംഘിച്ച് ഇന്ത്യക്കുനേരെ ആക്രമണം നടത്തുന്നതായി കേന്ദ്ര ആഭ്യന്തര മന്ത്രാലയം. 2015ലും 2016ലും തുടര്‍ച്ചയായി വെടിനിര്‍ത്തല്‍ കരാര്‍ ലംഘിച്ചിട്ടുണ്ടെന്നാണ് വിവരാവകാശ നിയമപ്രകാരമുള്ള അപേക്ഷക്കുള്ള മറുപടിയില്‍ ആഭ്യന്തര മന്ത്രാലയം വ്യക്തമാക്കിയത്.
2012നും 2016നും ഇടയില്‍ 1,142 ഭീകരാക്രമണങ്ങളാണ് ജമ്മുകശ്മിരില്‍ റിപ്പോര്‍ട്ട് ചെയ്തത്. ഇക്കാലയളവില്‍ 236 സുരക്ഷാ ജവാന്‍മാരും 90 തദ്ദേശീയരും കൊല്ലപ്പെട്ടതായും ആഭ്യന്തര മന്ത്രാലയം പറയുന്നു. എന്നാല്‍ 507 ഭീകരരാണ് ഈ നാല് വര്‍ഷത്തിനുള്ളില്‍ മരിച്ചത്. 2015ല്‍ 405 തവണയാണ് പാകിസ്താന്‍ വെടിനിര്‍ത്തല്‍ കരാര്‍ ലംഘിച്ചത്.
ഇതിനേക്കാള്‍ കൂടുതലാണ് 2016ല്‍ റിപ്പോര്‍ട്ട് ചെയ്തത്. ആ വര്‍ഷം 449 തവണയാണ് പാക് പ്രകോപനം ഇന്ത്യക്കുനേരെയുണ്ടായത്. 2015നും 2016നും ഇടയില്‍ പാക് ആക്രമണത്തിലും ഭീകരരുമായുള്ള ഏറ്റുമുട്ടലിലും 23 സുരക്ഷാ സൈനികരാണ് മരിച്ചത്.
ഭീരുത്വമാണ് പാക് നടപടിയുടെ അടിസ്ഥാനമെന്ന് റിട്ട.മേജര്‍ ജനറല്‍ ജി.ഡി ബക്ഷി പറഞ്ഞു. പാകിസ്താന്‍ സമാധാനത്തെക്കുറിച്ചാണ് പറയുന്നതെങ്കിലും അവരെ വിശ്വസിക്കാന്‍ കഴിയില്ലെന്നതിന് ഏറ്റവും വലിയ തെളിവാണ് ഇപ്പോഴും കശ്മിരില്‍ നടക്കുന്ന അനിഷ്ട സംഭവങ്ങളെന്ന് അദ്ദേഹം വ്യക്തമാക്കി.