തിരുവനന്തപുരം: ഡി.വൈ.എഫ്.ഐ വനിതാ നേതാവിന്റെ പീഡന പരാതിയില്‍ ഷൊര്‍ണൂര്‍ എം.എല്‍.എയും സി.പി.എം പാലക്കാട് ജില്ലാ സെക്രട്ടേറിയറ്റ് അംഗവുമായ പി.കെ ശശിയ്‌ക്കെതിരേ പാര്‍ട്ടി നടപടിക്ക് ഒരുങ്ങുന്നു. സസ്‌പെന്‍ഷന്‍ ഉള്‍പ്പെടെയുള്ള അച്ചടക്ക നടപടികളാണ് പാര്‍ട്ടി എം.എല്‍.എക്ക് എതിരേ സ്വീകരിക്കുക. പി.കെ ശശിയ്‌ക്കെതിരേ എന്തു നടപടിയാണ് സ്വീകരിക്കേണ്ടതെന്ന് 30നും ഒക്ടോബര്‍ ഒന്നിനുമായി ചേരുന്ന സംസ്ഥാന കമ്മിറ്റിയില്‍ സ്വീകരിക്കും. 

ശശിക്കെതിരേ ഉയര്‍ന്നത് ഗുരുതര ആരോപണമായതിനാലും പാര്‍ട്ടിയില്‍ മാത്രം പരാതി ഒതുക്കി നിര്‍ത്തിയതിനാലും എത്രയും പെട്ടെന്ന് നടപടിയിലേക്ക് പോകണമെന്ന് ഇന്നലെ ചേര്‍ന്ന സി.പി.എം സംസ്ഥാന സെക്രട്ടേറിയറ്റ് യോഗത്തില്‍ തീരുമാനിച്ചു. പരാതിക്കാരി പൊലിസില്‍ പരാതിപ്പെടുകയോ, ദേശീയ വനിതാ കമ്മിഷന് മൊഴി കൊടുക്കുകയോ ചെയ്താല്‍ പാര്‍ട്ടി കൂടുതല്‍ പ്രതിരോധത്തിലാകുമെന്ന് സെക്രട്ടേറിയറ്റ് വിലയിരുത്തിയതിനെ തുടര്‍ന്നാണ് പെട്ടെന്നുള്ള നടപടിയിലേക്ക് സെക്രട്ടേറിയറ്റ് നീങ്ങുന്നത്.
സംഭവത്തില്‍ മന്ത്രി എ.കെ ബാലന്‍, പി.കെ ശ്രീമതി എം.പി എന്നിവരെ അംഗങ്ങളാക്കി സംസ്ഥാന സെക്രട്ടേറിയറ്റ് അന്വേഷണ കമ്മിഷന്‍ രൂപീകരിച്ചിട്ടുണ്ട്. പരാതിയില്‍ പ്രാഥമിക വിലയിരുത്തലില്‍ ശശി കുറ്റക്കാരനാണെന്ന് എ.കെ ബാലനും പി.കെ ശ്രീമതിയും ഇന്നലെ സെക്രട്ടേറിയറ്റ് യോഗത്തില്‍ വ്യക്തമാക്കി. അടുത്ത സംസ്ഥാന കമ്മിറ്റിക്ക് മുന്‍പ് അന്തിമ റിപ്പോര്‍ട്ടും നടപടി ശുപാര്‍ശയും അന്വേഷണ കമ്മിഷന്‍ നല്‍കണമെന്നും സെക്രട്ടേറിയറ്റ് തീരുമാനിച്ചിട്ടുണ്ട്.
ശശിക്കെതിരായ പരാതിയില്‍ പൊലിസ് കേസെടുക്കില്ലെങ്കിലും പ്രാഥമികാന്വേഷണം നടത്തും. ദേശീയ വനിതാ കമ്മിഷന്‍ അധ്യക്ഷയുടെ മൊഴിയെടുക്കലിന് മുന്നോടിയായാണ് തിരക്കിട്ട നീക്കങ്ങള്‍ നടക്കുന്നത്. സ്വമേധയാ കേസെടുക്കില്ലെന്നാണ് നിലവിലെ സൂചനയെങ്കിലും ദേശീയ വനിതാ കമ്മിഷന്‍ അധ്യക്ഷ ഉള്‍പ്പെടെയുള്ളവര്‍ കേരളത്തിലെത്തി യുവതിയുടെ മൊഴിയെടുക്കുമെന്നതിനാല്‍ പൊലിസിന് മുഖംരക്ഷിക്കാനായി ഉടന്‍ എന്തെങ്കിലും നടപടികള്‍ സ്വീകരിക്കേണ്ടിവരും. ഇതിന്റെ ഭാഗമായി തന്നെയാണ് കെ.എസ്.യു-യുവമോര്‍ച്ച പ്രവര്‍ത്തകര്‍ നല്‍കിയ പരാതിയില്‍ ഡി.ജി.പി ഡയരക്ടര്‍ ജനറല്‍ ഓഫ് പ്രോസിക്യൂഷനോട് നിയമോപദേശം തേടിയിരിക്കുന്നത്.