പന്തീരാങ്കാവ്: സൗദിയില്‍നിന്ന് നാട്ടിലെത്തിയ യുവാവിന്റെ കാര്‍ പിന്തുടര്‍ന്ന് കാര്‍ തട്ടിയെടുത്തു. കാറിലുണ്ടായിരുന്നവര്‍ മര്‍ദനത്തിനിരയായി. ഇന്നലെ പുലര്‍ച്ചെ 2.30ന് പൊറ്റമ്മല്‍ ജങ്ഷനിലാണു സംഭവം. സൗദിയില്‍ സിവില്‍ എന്‍ജിനീയറായ മുക്കം കുമരനല്ലൂര്‍ മുഹമ്മദ് ജംനാസ് (28) കരിപ്പൂരില്‍ വിമാനമിറങ്ങി സുഹൃത്തുക്കളായ പൂളക്കടവ് ഷിയാസു റഹ്മാന്‍ (26), മനാസ് എന്നിവരോടൊത്ത് കാറില്‍ കോഴിക്കോട് അശോക ഹോസ്പിറ്റലിലേക്ക് വരികയായിരുന്നു. ഹോസ്പിറ്റലില്‍ പ്രസവം കഴിഞ്ഞ് കിടക്കുന്ന ഭാര്യയെയും കുട്ടിയെയും കാണാനാണ് നാട്ടിലേക്കു പുറപ്പെട്ടത്.
പൊറ്റമ്മല്‍ ജങ്ഷനില്‍ വച്ച് ഇന്നോവ കാറിലെത്തിയ സംഘം ഇവര്‍ സഞ്ചരിച്ച കാറിനെ മറികടന്ന് തടഞ്ഞുനിര്‍ത്തുകയും മര്‍ദിക്കുകയും ചെയ്തു. ഇവരെ പുറത്തേക്ക് വലിച്ചിട്ടശേഷം കാറുമായി സംഘം കടന്നുകളയുകയായിരുന്നു. മര്‍ദനമേറ്റ ഷിയാസ് പൊലിസ് കണ്‍ട്രോള്‍ റൂമിലെത്തി വിവരം പറഞ്ഞതിനെ തുടര്‍ന്ന് പൊലിസ് ആശുപത്രിയിലെത്തിച്ചു. മുഹമ്മദ് ജംനാസ് ഭാര്യയെ സന്ദര്‍ശിച്ച ശേഷം നഗരത്തിലെ സ്വകാര്യ ആശുപത്രിയില്‍ ചികിത്സ തേടി. വിവരമറിഞ്ഞ് മെഡിക്കല്‍ കൊളജ് പൊലിസ് സ്ഥലത്തെത്തി തുടര്‍നടപടികള്‍ സ്വീകരിച്ചു. വിരലടയാള വിദഗ്ധരും സ്ഥലത്തെത്തിയിരുന്നു.
അതിനിടെ ഇവര്‍ സഞ്ചരിച്ച കാര്‍ അഴിഞ്ഞിലം ഭാഗത്ത് ഉപേക്ഷിക്കപ്പെട്ട നിലയില്‍ കണ്ടെത്തി. കാര്‍ പൊലിസ് കസ്റ്റഡിയിലെടുത്തു. ആശുപത്രിയിലുള്ള ഭാര്യയെ കാണാന്‍ വന്നതിനാല്‍ കാര്യമായ ലഗേജുകള്‍ ഒന്നും ഉണ്ടായിരുന്നില്ല. വസ്ത്രങ്ങള്‍ അടങ്ങിയ ബാഗില്‍ മൊബൈല്‍ ഫോണ്‍ ഉള്‍പ്പെടെ നഷ്ടപ്പെട്ടു. സംഭവത്തില്‍ മെഡിക്കല്‍ കോളജ് പൊലിസ് കേസെടുത്തു.
സി.ഐ മൂസ വള്ളിക്കാടനാണ് അന്വേഷണച്ചുമതല. പരിസരത്തെ സി.സി ടി.വി, ട്രാഫിക് കാമറകള്‍ തുടങ്ങിയവ സൈബര്‍ സെല്ലിന്റെ സഹായത്തോടെ പരിശോധിക്കുന്നുണ്ട്. പ്രതികള്‍ സഞ്ചരിച്ച ഇന്നോവ കാര്‍ കണ്ടെത്തുന്നതിനു വേണ്ടി ഊര്‍ജിത ശ്രമമാണ് പൊലിസ് നടത്തുന്നത്.