പനമരം: ടൗണും പരിസരങ്ങളും തെരുവുനായകള്‍ കീഴടക്കുന്നു. തെരുവുനായ്ക്കള്‍ വര്‍ധിച്ചതോടെ ടൗണിലും പരിസരങ്ങളില്‍ കാല്‍നടയായി സഞ്ചരിക്കാന്‍ കഴിയാത്ത സ്ഥിതിയിലായിട്ടുണ്ട്. പനമരം ഗവ.ആശുപത്രി പരിസരം, മീന്‍ മാര്‍ക്കറ്റ്, പഴയ നടവയല്‍ റോഡ്, പനമരം പഞ്ചായത്ത് ഓഫിസ് മുന്‍വശം എന്നിവിടങ്ങളിലൊക്കെ തെരുവ് നായ്ക്കള്‍ കൂട്ടമായി തമ്പടിക്കുകയാണ്.
തെരുവ് നായകള്‍ വഴിയാത്രക്കാരെയും വിദ്യാര്‍ഥികളേയും ആക്രമിച്ച സംഭവങ്ങളുമുണ്ടായിട്ടുണ്ട്. രാത്രികാലങ്ങളില്‍ ബസ് സ്റ്റാന്‍ഡ് പരിസരത്താണ് നായ്ക്കള്‍ കൂട്ടമായെത്തുന്നത്. മാലിന്യങ്ങള്‍ കടിച്ചുവലിച്ച് റോഡിലിടുന്നതും പതിവു കാഴ്ചയാണ്.
എന്നാല്‍ തെരുവ് നായ്ക്കള്‍ പെരുകുന്നതിനെതിരേ അധികൃതര്‍ നടപടി സ്വീകരിച്ചില്ലെന്ന് നാട്ടുകാര്‍ ആരോപിക്കുന്നു. തെരുവുനായ ശല്യത്തിനെതിരേ സംഘടിക്കാനുള്ള ഒരുക്കത്തിലാണ് നാട്ടുകാര്‍.