തിരുവനന്തപുരം: സെക്രട്ടേറിയറ്റിലെ ജീവനക്കാര്‍ക്കു വേണ്ടി സ്ഥിരമായി സര്‍വിസ് നടത്തിയിരുന്ന സ്വകാര്യ ബസ് മോട്ടോര്‍ വാഹന വകുപ്പ് പിടികൂടി. കെ.എസ്.ആര്‍.ടി.സിയുടെ പരാതിയിലാണ് നടപടി. ദേശസാല്‍കൃത പാതയില്‍ പെര്‍മിറ്റില്ലാതെ സ്വകാര്യ ബസുകളോടിക്കുന്നത് സര്‍ക്കാര്‍ ജീവനക്കാരുടെ വാട്‌സ്ആപ്പ് കൂട്ടായ്മയുടെ പേരിലാണ്.

വിദ്യാഭ്യാസ വകുപ്പിലെയും സെക്രട്ടേറിയറ്റിലെയും ജീവനക്കാര്‍ക്കായി അഞ്ചല്‍ മുതല്‍ സ്റ്റാച്യു വരെ പ്രതിദിനം സര്‍വിസ് നടത്തിയിരുന്ന പ്രിയ എന്ന ബസാണ് പിടികൂടിയത്. നേരത്തെ രണ്ട് തവണ ബസിന് പിഴയിട്ടെങ്കിലും സര്‍വിസ് നിര്‍ത്തിയിരുന്നില്ല. തുടര്‍ന്ന് കെ.എസ്.ആര്‍.ടി.സി എക്‌സിക്യൂട്ടീവ് ഡയരക്ടര്‍ ട്രാന്‍സ്‌പോര്‍ട്ട് കമ്മിഷനര്‍ക്ക് നല്‍കിയ പരാതിയിലാണ് ഇപ്പോഴത്തെ നടപടി. അഞ്ചല്‍ സ്വദേശി ദിലീപിന്റെ ഉടമസ്ഥതയിലുള്ളതാണ് വാഹനം. കോണ്‍ട്രാക്റ്റ് കാര്യേജ് വാഹനം സ്റ്റേജ് കാര്യേജായി സര്‍വിസ് നടത്തിയതിനോടൊപ്പം ഡ്രൈവര്‍ക്ക് ലൈസന്‍സില്ലാതിരുന്നതും അന്വേഷിക്കും. ഇത്തരത്തില്‍ രണ്ട് ബസുകളാണ് സര്‍ക്കാര്‍ ജീവനക്കാര്‍ക്കായി സ്ഥിരം സര്‍വിസ് നടത്തിയിരുന്നത്. സമാന്തര ബസ് സര്‍വിസുകള്‍ക്കെതിരേ കെ.എസ്.ആര്‍.ടി.സിയുടെ വിജിലന്‍സ് വിഭാഗവും മോട്ടോര്‍ വാഹന വകുപ്പും നടത്തുന്ന പരിശോധന ഒരാഴ്ചയിലധികമായി തുടരുകയാണ്.