കാസര്‍കോട്: ജില്ലയില്‍ കുറ്റകൃത്യം തടയുന്നതിനും കുറ്റവാളികളെ കണ്ടെത്താനും പൊലിസ് ഉണര്‍ന്ന് പ്രവര്‍ത്തിക്കാനൊരുങ്ങുന്നു. ഇതിന്റ ഭാഗമായി പൊലിസിനെ കുറ്റകൃത്യങ്ങള്‍ സംബന്ധിച്ച വിവരം കൈമാറാന്‍ ഫോണ്‍ നമ്പര്‍ തയാറാക്കി.
24 മണിക്കൂറും 9497975812 എന്ന ഫോണ്‍ നമ്പറിലേക്ക് പൊതു ജനങ്ങള്‍ക്ക് കുറ്റവാളികളെ സംബന്ധിച്ച വിവരങ്ങള്‍ കൈമാറാവുന്നതാണ്. വിവരങ്ങള്‍ പൊലിസ് രഹസ്യമാക്കി വെക്കും.
ജില്ലയില്‍ അനധികൃതമായി മണല്‍ കടത്തുന്നതും മറ്റു മാഫിയാ പ്രവര്‍ത്തനങ്ങളും തടയുന്നതിനു വേണ്ടി പൊലിസ് നടപടി ശക്തമാക്കിയതായി ജില്ലാ പൊലിസ് മേധാവി കെ.ജി സൈമണ്‍ പറഞ്ഞു.
2017 ല്‍ ഇതുവരെ മണല്‍ കടത്തുമായി ബന്ധപ്പെട്ട് 335 കേസുകള്‍ രജിസ്റ്റര്‍ ചെയ്തു. 342 വാഹനങ്ങള്‍ കണ്ടുകെട്ടി. 285 പ്രതികളെ അറസ്റ്റ് ചെയ്തു. കളവ് കേസുകളില്‍ 2017ല്‍ ഇതുവരെ 68 കേസുകളിലായി 43 പ്രതികളെ അറസ്റ്റ് ചെയ്തു.
ജില്ലയിലേക്ക് കഞ്ചാവ് ഭൂരിഭാഗവും വരുന്നത് ഒഡിഷ, ആന്ധ്ര സംസ്ഥാനങ്ങളില്‍ നിന്ന് മടിക്കേരി, തലപ്പാടി തുടങ്ങിയ സ്ഥലങ്ങളില്‍ കൂടിയാണ്.
ജില്ലയില്‍ 2015 ല്‍ 53 കഞ്ചാവ് കേസുകളില്‍ 65 പ്രതികളെ അറസ്റ്റ് ചെയ്തു. 15.320 കിലോഗ്രാം കഞ്ചാവ് പിടിച്ചെടുത്തു. 2016ല്‍ 83 കഞ്ചാവ് കേസുകളില്‍ 127 പ്രതികളെ അറസ്റ്റ് ചെയ്തു.
138.843 കിലോഗ്രാം കഞ്ചാവ് പിടിച്ചെടുത്തു. 2017 ല്‍ ഇതുവരെയായി 11 കഞ്ചാവ് കേസുകളില്‍ 14 പ്രതികളെ അറസ്റ്റ് ചെയ്തു. 13.553 കിലോഗ്രാം കഞ്ചാവ് പിടിച്ചെടുത്തു.