തിരുന്നാവായ: തിരുന്നാവായ പുത്തനത്താണി റോഡിലേക്ക് ചാഞ്ഞു നിന്നിരുന്ന മരത്തില്‍ കണ്ടെയ്‌നര്‍ ലോറിയിടിച്ച് ഗതാഗതം മുടങ്ങി. എടക്കുളം കുന്നുംപുറം ഇര്‍ശാദ് സ്വിബിയാന്‍ ഓഡിറ്റോറിയത്തിന് സമീപത്തുളള ചീനി മരത്തിലാണ് ലോറിയിടിച്ചത്. ഇന്നലെ പുലര്‍ച്ചെ ഒരു മണിയോടെയാണ് സംഭവം.
ഇടിയുടെ ആഘാതത്തില്‍ മരത്തിന്റെ കൊമ്പ് പൊട്ടി വീണതിനെ തുടര്‍ന്ന് ഏറെനേരം ഗതാഗത തടസ്സം നേരിട്ടു. സംഭവമറിഞ്ഞെത്തിയ പ്രദേശവാസികളായ ഒരു കൂട്ടം യുവാകളാണ് മരത്തിന്റെ ശിഖരങ്ങള്‍ വെട്ടി മാറ്റിയത്.
മരംവെട്ടുകാരനായ സി.പി ഇബ്രാഹിമിന്റെ നേതൃത്വത്തില്‍ സി.പി മൊയ്തീന്‍, ഇ.പി മുഹമ്മദ്ഷ, വി മുനീര്‍ തുടങ്ങിയവരാണ് ഏറെ നേരത്തെ പരിശ്രമത്തിനൊടുവില്‍ മരകൊമ്പുകള്‍ വെട്ടി മാറ്റി ഗതാഗത തടസ്സം ഒഴിവാക്കിയത്. അപകടം വിതയ്ക്കാവുന്ന രീതിയില്‍ റോഡിന്റെ ഇരു വശങ്ങളിലും സ്ഥിതി ചെയ്യുന്ന മരങ്ങള്‍ വെട്ടി മാറ്റണമെന്ന് നാട്ടുകാര്‍ ആവശ്യപ്പെട്ടു തുടങ്ങിയിട്ട്. എന്നാല്‍ ഇതിനായി യാതൊരു നടപടിയും ഇതുവരെ സ്വീകരിച്ചിട്ടില്ല.