മൂവാറ്റുപുഴ: അനധികൃത അറവ് മാംസം വില്‍പ്പന കേന്ദ്രങ്ങളില്‍നിന്നും പുഴയിലേക്ക് തള്ളിയ മാംസാവശിഷ്ടങ്ങള്‍ കേബിളില്‍ കുടുങ്ങി കിടന്നു. മൂവാറ്റുപുഴ-കോതമംഗലം കാളിയാര്‍ റോഡുമായി ബന്ധിക്കുന്ന കറുകടകാശ്ശേരി പാലത്തിന്റെ താഴെ കാളിയാര്‍പുഴയ്ക്ക് കുറുകെ വലിച്ച കേബിളിലാണ് അറവ് കേന്ദ്രങ്ങളില്‍ നിന്നുമെത്തിച്ച കുടലും പണ്ടവും പതിരും അടക്കമുള്ള മാംസാവശിഷ്ടങ്ങള്‍ കുടുങ്ങിക്കിടക്കുന്നത്.
ഇന്നലെ രാവിലെ പുഴയില്‍ കുളിക്കാനെത്തിയവരാണ് പാതി പ്ലാസ്റ്റിക് ചാക്കില്‍ പൊതിഞ്ഞ് കുടങ്ങികിടക്കുന്നത് കണ്ടെത്തിയത്. തുടര്‍ന്ന് പഞ്ചായത്ത് അധികൃതരെ വിവരമറിയിക്കുകയായിരുന്നു.
പായിപ്ര-ആയവന പഞ്ചായത്തുകളെ ബന്ധിപ്പിക്കുന്ന ഈ പാലത്തില്‍നിന്നും പതിവായി മാംസാവശിഷ്ടങ്ങള്‍ തള്ളുന്നുണ്ടെന്ന് നാട്ടുകാര്‍ പറഞ്ഞു. ഇരുപഞ്ചായത്ത് അധികൃതര്‍ക്ക് നിരവധി പരാതികള്‍ നല്‍കിയിട്ടും നടപടിയില്ലെന്നും ഇവര്‍ വ്യക്തമാക്കുന്നു.