ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ കിരീടത്തിന് തൊട്ടരികിലെത്തി ചെല്‍സി. സ്വന്തം തട്ടകത്തില്‍ മിഡ്ഡ്ല്‍സ്‌ബ്രോയെ മറുപടിയില്ലാത്ത മൂന്ന് ഗോളുകള്‍ക്ക് കീഴടക്കിയാണ് അന്റോണിയോ കോണ്ടെയുടെ സംഘം പ്രീമിയര്‍ ലീഗ് കിരീടത്തിനിരികിലെത്തിയത്.
ഒരു വിജയം മാത്രം മതി നീലപ്പടയ്ക്ക് കിരീടം സ്വന്തമാക്കാന്‍. 35 മത്സരങ്ങളില്‍ നിന്ന് 84 പോയിന്റുള്ള അവര്‍ക്ക് നിലവില്‍ ഭീഷണികളൊന്നുമില്ല എന്നതിനാല്‍ കിരീടം ഏതാണ്ടുറപ്പായിട്ടുണ്ട്. രണ്ടാം സ്ഥാനത്തുള്ള ടോട്ടനത്തിന് ഇത്രയും മത്സരങ്ങളില്‍ നിന്ന് 77 പോയിന്റുകള്‍.
ആദ്യ പകുതിയില്‍ രണ്ടും രണ്ടാം പകുതിയില്‍ ഒരു ഗോളും നേടിയാണ് ചെല്‍സിയുടെ വിജയം. കളിയുടെ 23ാം മിനുട്ടില്‍ ഡീഗോ കോസ്റ്റയും 34ാം മിനുട്ടില്‍ മാര്‍ക്കോസ് അലോണ്‍സോയും 65ാം മിനുട്ടില്‍ മാറ്റിചും ചെല്‍സിക്കായി വല ചലിപ്പിച്ചു.
തോല്‍വിയോടെ മിഡ്ഡ്ല്‍സ്‌ബ്രോ രണ്ടാം ഡിവിഷനിലേക്ക് തരംതാഴ്ത്തപ്പെട്ടു. തുടര്‍ച്ചയായി ഇത് നാലാം തവണയാണ് ഒന്നാം ഡിവിഷനിലേക്ക് സ്ഥാനം കയറി ആ സീസണില്‍ മോശം പ്രകടനം ആവര്‍ത്തിച്ച് മിഡ്ഡ്ല്‍സ്‌ബ്രോ രണ്ടാം ഡിവിഷനിലേക്ക് ഇറങ്ങുന്നത്.

ലെഗാനസിന് ജയം
മാഡ്രിഡ്: സ്പാനിഷ് ലാ ലിഗയില്‍ ലെഗാനസിന് വിജയം. റയല്‍ ബെറ്റിസിനെ അവര്‍ മറുപടിയില്ലാത്ത നാല് ഗോളുകള്‍ക്ക് തകര്‍ത്തു.

രണ്ടാം ജയത്തോടെ
ഐസ്വാള്‍
കട്ടക്ക്: ഐ ലീഗ് ചാംപ്യന്‍മാരായ ഐസ്വാള്‍ എഫ്.സിക്ക് ഫെഡറേഷന്‍ കപ്പ് പോരാട്ടത്തില്‍ തുടര്‍ച്ചയായ രണ്ടാം ജയം. ചര്‍ച്ചില്‍ ബ്രദേഴ്‌സിനെ അവര്‍ ഒന്നിനെതിരേ രണ്ട് ഗോളുകള്‍ക്ക് വീഴ്ത്തി. മറ്റൊരു മത്സരത്തില്‍ കരുത്തരായ ഈസ്റ്റ് ബംഗാള്‍ ചെന്നൈ സിറ്റിയെ പരാജയപ്പെടുത്തി. മറുപടിയില്ലാത്ത രണ്ട് ഗോളുകള്‍ക്കാണ് ഈസ്റ്റ് ബംഗാള്‍ വിജയിച്ചത്. ഈസ്റ്റ് ബംഗാളിനായി റോബിന്‍ സിങ് ഇരട്ട ഗോളുകള്‍ നേടി.