തിരുവനന്തപുരം: കേരളത്തിലെ ദേശീയപാതാ വികസനത്തിന് മുന്‍ഗണന നല്‍കാനുള്ള തീരുമാനം നടപ്പാക്കാതെ കേന്ദ്രം. ഇപ്പോഴും കേരളം പരിഗണന കുറഞ്ഞ ഹൈ ടു പട്ടികയിലാണുള്ളത്. കേന്ദ്രമന്ത്രി അല്‍ഫോണ്‍സ് കണ്ണന്താനം ഇടപെട്ട് മുന്‍ഗണനാ പട്ടികയില്‍ ഉള്‍പ്പെടുത്തി എന്നായിരുന്നു വാദം.
കേന്ദ്രസര്‍ക്കാരുമായി ആലോചിച്ചശേഷം പരിഗണന കൂടിയ ഹൈ വണ്‍ വിഭാഗത്തില്‍ കേരളത്തെ ഉള്‍പ്പെടുത്താന്‍ നടപടിയെടുത്തെന്നും അവകാശവാദമുണ്ടായിരുന്നു. എന്നാല്‍, നഷ്ടപരിഹാരം വിതരണം ചെയ്യേണ്ടെന്നാണ് ഈ മാസം 15ന് കേന്ദ്രസര്‍ക്കാര്‍ പുറത്തിറക്കിയ ഉത്തരവില്‍ പറയുന്നത്.
ദേശീയപാതാ വികസനത്തില്‍ കേരളത്തെ ഒന്നാമതായി പരിഗണിക്കണമെന്ന് ആവശ്യപ്പെട്ട് കേന്ദ്ര ഗതാഗത മന്ത്രി നിതിന്‍ ഗഡ്കരിക്ക് അല്‍ഫോണ്‍സ് കണ്ണന്താനം കത്തയച്ചിരുന്നു. കാസര്‍കോട് മുതല്‍ പാറശാല വരെയുള്ള ദേശീയപാതയുടെ വികസനം മുന്‍ഗണനാ പട്ടികയില്‍ ഒന്നാമതായി പരിഗണിക്കണമെന്നാണ് കണ്ണന്താനം കത്തില്‍ ആവശ്യപ്പെട്ടത്. ദേശീയപാതാ വികസനം മുന്‍ഗണനാ പട്ടികയില്‍നിന്ന് കേരളത്തെ ഒഴിവാക്കിക്കൊണ്ടുള്ള വിജ്ഞാപനം നിതിന്‍ ഗഡ്കരി റദ്ദാക്കിയതായുള്ള റിപ്പോര്‍ട്ടുകള്‍ പുറത്തുവന്നിരുന്നു.
ദേശീയപാതാ വികസനത്തില്‍ കേരളത്തോട് യാതൊരു വിവേചനവും കേന്ദ്രസര്‍ക്കാര്‍ കാണിക്കില്ല. ദേശീയപാതാ വികസനത്തില്‍ കേരളം നേരിടുന്ന പ്രധാന വിഷയം ഭൂമിയേറ്റെടുക്കലാണ്. ഇക്കാര്യത്തില്‍ ഔദ്യോഗികമായി ഉടന്‍ വ്യക്തത വരുത്തുമെന്നും നിതിന്‍ ഗഡ്കരി അറിയിച്ചിരുന്നു.