കോഴിക്കോട്: 'ഖുര്‍ആന്‍ സുകൃതങ്ങളുടെ വചനപ്പൊരുള്‍' എന്ന പ്രമേയവുമായി എസ്.കെ.എസ്.എസ്.എഫ് സംസ്ഥാന വ്യാപകമായി നടത്തുന്ന റമദാന്‍ കാംപയിനിന്റെ സംസ്ഥാനതല ഉദ്ഘാടനം മെയ് 18ന് കോഴിക്കോട് നടക്കും.
ഉച്ചക്ക് മൂന്ന് മണിക്ക് കെ.പി കേശവമേനോന്‍ ഹാളില്‍ നടക്കുന്ന പരിപാടി ദാറുല്‍ ഹുദാ ഇസ്‌ലാമിക് യൂനിവേഴ്‌സിറ്റി വൈസ് ചാന്‍സലര്‍ ഡോ. ബഹാഉദ്ദീന്‍ മുഹമ്മദ് നദ്‌വി ഉദ്ഘാടനം ചെയ്യും. സംസ്ഥാന പ്രസിഡന്റ് പാണക്കാട് സയ്യിദ് ഹമീദലി ശിഹാബ് തങ്ങള്‍ അധ്യക്ഷനാകും.
മുന്‍ ഡി.ജി.പി ഡോ. അലക്‌സാണ്ടര്‍ ജേക്കബ് മുഖ്യാതിഥിയായിരിക്കും. പ്രമുഖ പണ്ഡിതന്മാരും സാമൂഹ്യ സാംസ്‌കാരിക രംഗത്തെ പ്രമുഖരും സംബന്ധിക്കും.
കാംപയിനിന്റെ ഭാഗമായി സംസ്ഥാനതല ഖുര്‍ആന്‍ ക്വിസ് മത്സരം, സകാത്ത് സെമിനാറുകള്‍, തസ്‌കിയത്ത് മീറ്റുകള്‍, ശാഖാ തലങ്ങളില്‍ ഖുര്‍ആന്‍ പാരായണ പരിശീലന ക്യാംപുകള്‍, ഇഫ്താര്‍ സംഗമങ്ങള്‍ തുടങ്ങിയവ നടക്കും.