തൊടുപുഴ :അറക്കുളം സെന്റ് ജോസഫ്‌സ് കോളജില്‍ നിന്നും കാണാതായ മൂന്ന് വിദ്യാര്‍ഥിനികളെ കണ്ടെത്തി.വീട്ടുകാരറിയാതെ ഗോവ കാണാന്‍ പോയതായിരുന്നു മൂന്ന് വിദ്യാര്‍ഥിനികളും.
ഇവരെ കണ്ണൂരില്‍ നിന്നുമാണ് പിടികൂടിയത്. അറക്കുളം, ഇലപ്പള്ളി സ്വദേശിനികളായ മൂന്ന് വിദ്യാര്‍ഥിനികളാണ് വീട്ടില്‍ അറിയിക്കാതെ വ്യാഴാഴ്ച ഉച്ചയോടെ ഗോവക്ക് വണ്ടി കയറിയത്. അയല്‍വാസികളയ ഇവരില്‍ രണ്ട് പേര്‍ ബിരുദ വിദ്യാര്‍ഥിനികളുമാണ്.
രാവിലെ പരീക്ഷയെഴുതാനായി പോകുന്നതായി പറഞ്ഞാണ് ഇവര്‍ വീട്ടില്‍ നിന്നും ഇറങ്ങിയത്. വൈകിട്ട് ആറ് മണി കഴിഞ്ഞിട്ടും ഇവരെ കാണാതായതോടെ രക്ഷിതാക്കള്‍ പരാതിയുമായി കാഞ്ഞാര്‍ പൊലിസ് സ്‌റ്റേഷനിലെത്തുകയായിരുന്നു.
എവിടേക്ക് പോയെന്നൊ എന്തിന് പോകുന്നെന്നൊ യാതൊന്നും വീട്ടുകാര്‍ക്ക് അറിയില്ലായിരുന്നു. തുടര്‍ന്ന് നടത്തിയ അന്വേഷണമാണ് കണ്ണൂരില്‍ നിന്നും വിദ്യാര്‍ഥിനികളെ പിടികൂടാന്‍ സഹായകമായത്.രണ്ടര മണിയോടെ കണ്ണൂരിലെത്തിയ ട്രെയിനില്‍ നിന്നും ഇവരെ പൊലിസ് കണ്ടെത്തുകയായിരുന്നു. വ്യാഴാഴ്ച 12.30വരെ ഇവര്‍ കോളജ് പരിസരത്തുണ്ടായിരുന്നതായി മൊബൈല്‍ ടവര്‍ കേന്ദ്രീകരിച്ചു നടന്ന അന്വേഷണത്തില്‍ വിവരം ലഭിച്ചിരുന്നു.