കല്‍പ്പറ്റ: നീറ്റ് പരീക്ഷയില്‍ ഉന്നത വിജയം നേടിയ ഭിന്നശേഷിക്കാരി കൊല്ലം കരുനാഗപ്പള്ള സ്വദേശിനി ആമിനയുടെ ആഗ്രഹം സഫലമായി. കോണ്‍ഗ്രസ് നേതാവ് രാഹുല്‍ ഗാന്ധിയെ കണ്ട് തന്റെ ആവശ്യങ്ങള്‍ ബോധിപ്പിക്കണമെന്നായിരുന്നു ആമിനയുടെ ആഗ്രഹം.

കെ.സി വേണുഗോപാല്‍ എം.പിയാണ് ആമിനക്ക് രാഹുലിനെ കാണാനുള്ള അവസരമൊരുക്കിയത്. കെ.പി.സി.സി ജനറല്‍ സെക്രട്ടറി സി.ആര്‍ മഹേഷിനൊപ്പം കരുനാഗപ്പള്ളിയില്‍ നിന്ന് ആമിന വയനാട്ടിലെത്തുകയായിരുന്നു.

പരിമിതികളെ ഇഛാശക്തി കൊണ്ട് മറികടന്ന് നീറ്റ് പരീക്ഷയില്‍ ഉന്നത വിജയം നേടിയ ആമിനയുടെ വീട്ടിലെ സാഹചര്യങ്ങളും വളരെ പ്രയാസകരമാണ്. ഡയാലിസിസ് ചെയ്യുന്ന അവസ്ഥയിലാണ് പിതാവ്.

ഏക വരുമാനമാര്‍ഗം ഉമ്മയുടെ ജോലിയായിരുന്നു. അതും നഷ്ടപ്പെട്ട അവസ്ഥയാണിപ്പോള്‍. ഈ സാഹചര്യങ്ങളെ വെല്ലുവിളിച്ച് നേടിയ ഉന്നത വിജയത്തിലും ഒരു വലിയ ആശങ്ക ബാക്കിയാണ്. അംഗപരിമിതി, മെഡിസിന് പഠിക്കുകയെന്ന വലിയ സ്വപ്നത്തിന് തുരങ്കം വയ്ക്കുമോയെന്ന്. ഈ ആശങ്ക ആമിന രാഹുല്‍ ഗാന്ധിയുമായി പങ്കുവച്ചു.