ക്വറ്റ: ബലൂചിസ്ഥാനില്‍ റോഡരികിലുണ്ടായ സ്‌ഫോടനത്തില്‍ 25 പേര്‍ മരിച്ചു. പാക് സെനറ്റിലെ ഡെപ്യൂട്ടി ചെയര്‍മാന്‍ മൗലാനാ അബ്ദുല്‍ ഗഫീര്‍ ഹൈദരി ഉള്‍പ്പെടെ 35 പേര്‍ക്ക് പരുക്കേറ്റതായി പൊലിസിനെ ഉദ്ധരിച്ച് പാക് ചാനലായ ജിയോ ടി.വി റിപ്പോര്‍ട്ട് ചെയ്തു. ബലൂചിസ്ഥാന്റെ തലസ്ഥാനമായ ക്വറ്റയില്‍ നിന്ന് 50 കി.മി അകലെയാണ് സ്‌ഫോടനമുണ്ടായ പ്രദേശം. 25 മൃതദേഹങ്ങള്‍ ക്വറ്റയിലെ രണ്ട് ആശുപത്രികളിലേക്ക് മാറ്റിയതായി ജില്ലാ ആരോഗ്യ ഓഫിസര്‍ ഡോ. ഷേര്‍ സമാന്‍ പറഞ്ഞു. പരുക്കേറ്റ 35 പേരും ക്വറ്റയിലെ ആശുപത്രിയില്‍ ചികിത്സയിലാണ്. 

ഹൈദരിയുടെ കാറിനെ ലക്ഷ്യംവച്ചാണ് ആക്രമണമെന്നാണ് സംശയിക്കുന്നത്. സ്‌ഫോടനം നടന്ന സ്ഥലത്തിനടുത്തെ ജാമിഅ മസ്ജിദ് ഹമ്മാദിയയിലെ ഇത്തിഹാദ് ബൈനുല്‍ മുസ്‌ലിമീന്റെ പരിപാടിയില്‍ പങ്കെടുത്ത് തിരിച്ചുവരികയായിരുന്നു ഹൈദരി. സാരമായി പരുക്കേറ്റ ഇദ്ദേഹത്തെ ക്വറ്റയിലെ സംയുക്ത സൈനിക ആശുപത്രിയിലേക്ക് മാറ്റിയെന്ന് ഡി.ഐ.ജി അബ്ദുല്‍ റസാഖ് ചീമ പറഞ്ഞു. ശക്തിയേറിയ സ്‌ഫോടനമാണ് നടന്നത്. ബുള്ളറ്റ് പ്രൂഫ് വാഹനത്തിലായിരുന്നു ഹൈദരിയുടെ യാത്ര. ചാവേര്‍ ആക്രമണമാണ് നടന്നതെന്ന് സംശയിക്കുന്നതായി പാക് മാധ്യമങ്ങള്‍ റിപ്പോര്‍ട്ട് ചെയ്തു.
ആക്രമണത്തെ കുറിച്ച് അന്വേഷണം നടത്തി എത്രയും വേഗം റിപ്പോര്‍ട്ട് സമര്‍പ്പിക്കാന്‍ ബലൂചിസ്ഥാന്‍ മുഖ്യമന്ത്രി സനാഉല്ല സെഹ്്‌രി ഉത്തരവിട്ടു. പാക് പ്രധാനമന്ത്രി നവാസ് ശരീഫും ആക്രമണത്തെ അപലപിച്ചു. ഹൈദരി വേഗത്തില്‍ സുഖം പ്രാപിക്കട്ടെയെന്നും അദ്ദേഹം ആശംസിച്ചു. രാജ്യത്തു നിന്ന് ഭീകരവാദത്തെ തുടച്ചു നീക്കുമെന്ന് പാക് പ്രസിഡന്റ് മംനൂന്‍ ഹുസൈന്‍ അനുശോചന സന്ദേശത്തില്‍ പറഞ്ഞു.