ന്യൂഡല്‍ഹി: നാഷനല്‍ ഹെറാള്‍ഡുമായി ബന്ധപ്പെട്ട കേസില്‍ കോണ്‍ഗ്രസ് അധ്യക്ഷ സോണിയാഗാന്ധിക്കും ഉപാധ്യക്ഷന്‍ രാഹുല്‍ഗാന്ധിക്കുമെതിരേ അന്വേഷണം നടത്താന്‍ ആദായ നികുതി വകുപ്പിനോട് ഡല്‍ഹി ഹൈക്കോടതി ഉത്തരവിട്ടുവെന്ന തരത്തില്‍ പ്രചരിക്കുന്ന വാര്‍ത്തകള്‍ അടിസ്ഥാനരഹിതമാണെന്ന് കോണ്‍ഗ്രസ്. കേന്ദ്രസര്‍ക്കാരാണ് ഇത്തരം പ്രചാരണങ്ങള്‍ക്ക് നേതൃത്വം നല്‍കുന്നതെന്നും സര്‍ക്കാര്‍ നടപടി കോടതിയലക്ഷ്യമാണെന്നും എ.ഐ.സി.സി വക്താവ് അഭിഷേക് സിങ്‌വി പറഞ്ഞു.
2014ല്‍ മോദി സര്‍ക്കാര്‍ അധികാരത്തില്‍ വന്നയുടന്‍ നാഷണല്‍ ഹെറാള്‍ഡ് ദിനപത്രത്തിന്റെ നടത്തിപ്പുകാരായ യങ് ഇന്ത്യന്‍ ലിമിറ്റഡിന്റെ ആറുവര്‍ഷം മുന്‍പുള്ള ഇടപാടുകളുടെ രേഖകള്‍ ഹാജരാക്കാന്‍ ആദായ നികുതി വകുപ്പ് ആവശ്യപ്പെടുകയായിരുന്നു. ആദായ നികുതി വകുപ്പിന്റെ ഈ നടപടിയെ ചോദ്യം ചെയ്താണ് യങ് ഇന്ത്യ ഡല്‍ഹി ഹൈക്കോടതിയില്‍ ഹരജി ഫയല്‍ ചെയ്തത്. ആറുവര്‍ഷം പഴക്കമുള്ള ഇടപാട് വീണ്ടും പരിശോധിക്കാന്‍ ആദായ നികുതി വകുപ്പിന് നിയമപരമായ അധികാരമില്ല എന്നതായിരുന്നു കമ്പനിയുടെ പ്രധാന വാദം.
ഇന്നലെ റിട്ട് പരിഗണനയ്‌ക്കെടുത്ത കോടതി ഇതടക്കമുള്ള വാദം ആദായ നികുതി വകുപ്പിനു മുന്നില്‍ ഉന്നയിക്കാന്‍ യങ് ഇന്ത്യയോട് നിര്‍ദേശിക്കുകയായിരുന്നു.
തങ്ങളുടെ വാദം ആദായ നികുതി വകുപ്പിന് മുന്നില്‍ ഉന്നയിക്കാന്‍ അവസരമുണ്ടാക്കി നല്‍കിയ സാഹചര്യത്തില്‍ ഹരജി പിന്‍വലിക്കുകയാണുണ്ടായതെന്ന് യങ് ഇന്ത്യക്കു വേണ്ടി ഹാജരായ മുതിര്‍ന്ന അഭിഭാഷകന്‍ അഭിഷേക് സിങ്‌വി വിശദീകരിച്ചു.