തിരുവനന്തപുരം: എസ്.ബി.ഐയെ ന്യായീകരിക്കേണ്ട ബാധ്യത ബി.ജെ.പിക്കില്ലെന്ന് സംസ്ഥാന അധ്യക്ഷന്‍ കുമ്മനം രാജശേഖരന്‍. കൂടുതല്‍ ബാങ്കിങ്് സേവനം ജനങ്ങളിലെത്തിക്കുക എന്നതാണ് കേന്ദ്ര സര്‍ക്കാരിന്റെ നയം. അതിനായി നിരവധി പരിപാടികള്‍ കേന്ദ്രം പ്രഖ്യാപിക്കുകയും നടപ്പാക്കുകയും ചെയ്യുന്നുണ്ട്.
ജനസേവനമായിരിക്കണം എസ്.ബി.ഐപോലുള്ള ബാങ്കുകള്‍ ചെയ്യേണ്ടത്. വാണിജ്യ താല്‍പര്യം പാടില്ലെന്നും കുമ്മനം രാജശേഖരന്‍ വാര്‍ത്താസമ്മേളനത്തില്‍ പറഞ്ഞു. ജനങ്ങള്‍ക്ക് ബുദ്ധിമുട്ടുണ്ടാകുന്ന ഒരു നടപടിയും ബാങ്കിന്റെ ഭാഗത്തുനിന്ന് ഉണ്ടാകരുതെന്ന് മാനേജ്‌മെന്റിനോടും കേന്ദ്ര ധനകാര്യ മന്ത്രിയോടും ആവശ്യപ്പെട്ടിട്ടുണ്ട്.
വ്യത്യസ്തങ്ങളായ 21 സംഘടനാ പരിപാടികളില്‍ അമിത്ഷാ പങ്കെടുക്കും. ജൂണ്‍ രണ്ടിന് കൊച്ചിയിലും മൂന്ന്, നാല് തിയതികളില്‍ തിരുവനന്തപുരത്തുമാണ് പരിപാടികള്‍. പുതുതായി നിര്‍മിക്കുന്ന പാര്‍ട്ടി സംസ്ഥാന കാര്യാലയത്തിന് നാലിന് രാവിലെ അമിത്ഷാ തറക്കല്ലിടും. 46,000 ചതുരശ്ര അടിയില്‍ നാലു നില കെട്ടിടമാണ് പണിയുക.
കേരളത്തില്‍ എന്‍.ഡി.എയുടെ അടിത്തറ വികസിപ്പിക്കാനുള്ള ചര്‍ച്ചകളിലും അമിത്ഷാ പങ്കെടുക്കും. 19ന് എന്‍.ഡി.എയുടെ യോഗം ചേരുമെന്നും കുമ്മനം രാജശേഖരന്‍ വ്യക്തമാക്കി.