ജോധ്പൂര്‍: ലോകപ്രശസ്ത നാടോടി നര്‍ത്തകന്‍ ക്വീന്‍ ഹരീഷ് വാഹനാപകടത്തില്‍ കൊല്ലപ്പെട്ടു. ഇദ്ദേഹത്തിനൊപ്പം സഞ്ചരിച്ചിരുന്ന മൂന്ന് നാടോടി കലാകാരന്മാരും മരിച്ചതായി പൊലിസ് അറിയിച്ചു. സംഘത്തിലുണ്ടായിരുന്ന അഞ്ചുപേരെ ഗുരുതര പരുക്കുകളോടെ ആശുപത്രിയില്‍ പ്രവേശിപ്പിച്ചു.
ഇന്നലെ രാവിലെ രാജസ്ഥാനിലെ ജോധ്പൂരിനടത്ത് ദേശീയ പാതയില്‍ കപര്‍ദ ഗ്രാമത്തിലായിരുന്നു അപകടം. ജെയ്‌സാല്‍മേറില്‍ നിന്ന് അജ്മിറിലേക്ക് പോവുകയായിരുന്നു ഇവര്‍.
ഇവരുടെ വാഹനം എതിരേ വന്ന ഒരു ട്രക്കില്‍ ഇടിച്ചായിരുന്നു അപകടം. നര്‍ത്തകന്‍ ക്വീന്‍ ഹരീഷിനൊപ്പം രവീന്ദ്ര, ഭിഖേ ഖാന്‍, ലത്തീഫ് ഖാന്‍ എന്നിവര്‍ സംഭവ സ്ഥലത്തുതന്നെ മരിച്ചതായി പൊലിസ് അറിയിച്ചു.
ഒരു പരിപാടിയില്‍ പങ്കെടുക്കാനായി പോകുമ്പോഴായിരുന്നു അപകടം. ഇവരുടെ മരണത്തില്‍ മുഖ്യമന്ത്രി അശോക് ഗലോട്ട് അനുശോചിച്ചു.
ജെയ്‌സാല്‍മേര്‍ സ്വദേശിയായ ഹരീഷ് കുമാര്‍ ക്വീന്‍ ഹരീഷ് എന്ന പേരിലാണ് അറിയപ്പെടുന്നത്. നാടോടി നര്‍ത്തന രംഗത്ത് ഏറെ പ്രശസ്തി പിടിച്ചുപറ്റിയ ഹരീഷിന്റെ ഘൂമര്‍, കല്‍ബേലിയ, ചാങ്, ഭാവല്‍. ചാരി തുടങ്ങിയ നൃത്ത പരിപാടികള്‍ ശ്രദ്ധേയമാണ്.