കൊച്ചി: പാലാരിവട്ടം ഓവര്‍ ബ്രിഡ്ജ് നിര്‍മാണത്തിലെ ക്രമക്കേടിനെ സംബന്ധിച്ച് വിജിലന്‍സ് മുവാറ്റുപുഴ കോടതിയില്‍ എഫ്.ഐ.ആര്‍ സമര്‍പ്പിച്ചു. വന്‍ ലാഭമുണ്ടാക്കാന്‍ ഉദ്യോഗസ്ഥരും കരാറുകാരും തമ്മില്‍ ഒത്തുകളിച്ചതായും കോടതിയില്‍ സമര്‍പ്പിച്ച എഫ്.ഐ.ആറില്‍ ചൂണ്ടിക്കാണിച്ചിട്ടുണ്ട്. റോഡ്‌സ് ആന്‍ഡ് ബ്രിഡ്ജസ് കോര്‍പറേഷനിലേയും കിറ്റ്കോയിലെയും ഉദ്യോഗസ്ഥരെ പ്രതിചേര്‍ത്താണ് റിപ്പോര്‍ട്ട് സമര്‍പ്പിച്ചിരിക്കുന്നത്.

കരാര്‍ കമ്പനിയായ ആര്‍.ഡി.എസിന്റെ എം.ഡിയടക്കം ആകെ അഞ്ച് പ്രതികളാണുള്ളത്. ക്രമക്കേട് സംബന്ധിച്ച് പ്രാഥമികാന്വേഷണത്തിലാണ് അന്വേഷം നടത്താന്‍ വിജിലന്‍സ് തീരുമാനിച്ചത്.
പാലം നിര്‍മാണത്തിന്റെ പോരായ്മ സംബന്ധിച്ച് ചെന്നൈ ഐ.ഐ.ടിയില്‍ നിന്നെത്തിയ സംഘം റിപ്പോര്‍ട്ട് നല്‍കിയിരുന്നു. ഇതിനു പിന്നാലെയാണ് സര്‍ക്കാര്‍ നിര്‍ദേശത്തെ തുടര്‍ന്ന് വിജിലന്‍സ് പരിശോധന നടത്തി വിദഗ്ധാഭിപ്രായം തേടിയത്.
അമിത ലാഭത്തിനുവേണ്ടി പാലത്തിന്റെ ഡിസൈന്‍ തന്നെ ഉദ്യോഗസ്ഥരും കരാറുകാരും മാറ്റി. നിലവാരമില്ലാത്ത സിമന്റ് ഉപയോഗിച്ചു. വേണ്ടത്ര കമ്പി ഉപയോഗിച്ചതുമില്ല. തുടങ്ങി ഒട്ടേറെ കുറ്റങ്ങളാണ് വിജലന്‍സ് അന്വേഷണത്തില്‍ കണ്ടെത്തിയിരിക്കുന്നത്. ഉദ്ഘാടനത്തിനുശേഷം കുറഞ്ഞ കാലത്തിനകം തന്നെ പാലം തകര്‍ന്നത് ഏറെ ചര്‍ച്ചയായിരുന്നു. ഇതേ തുടര്‍ന്ന് പാലം ഇപ്പോള്‍ അടച്ചിട്ട് പുനര്‍ നിര്‍മാണം പുരോഗമിക്കുകയാണ്.