ലഖ്‌നൗ: ഉത്തര്‍പ്രദേശില്‍ സ്‌കൂളുകളിലെ ചരിത്ര പാഠ്യപദ്ധതികള്‍ കാവിവല്‍ക്കരിക്കാന്‍ സര്‍ക്കാര്‍ നീക്കം. ഇതിന്റെ സൂചനകള്‍ മുഖ്യമന്ത്രി യോഗി ആദിത്യനാഥ് നല്‍കിക്കഴിഞ്ഞിട്ടുണ്ട്. ചരിത്രത്തെ വക്രീകരിച്ചവരെ തുറന്നുകാണിക്കേണ്ടതുണ്ടെന്ന് യോഗി പറഞ്ഞു.
ഗൂഢാലോചനയുടെ ഭാഗമായാണ് മഹാരാജ സുഹല്‍ദേവ് ഉള്‍പ്പെടെയുള്ള മഹാവ്യക്തികളുടെ പേര് ചരിത്രപുസ്തകങ്ങളില്‍നിന്ന് നീക്കം ചെയ്തതെന്ന് യോഗി പറഞ്ഞു. മുഗള്‍, ഡല്‍ഹി ഭരണകൂടങ്ങളുടെ ചരിത്രം പാഠപുസ്തകങ്ങളില്‍നിന്നു നീക്കം ചെയ്യുമെന്ന സൂചനകളും യോഗി നല്‍കി. മഹ്മൂദ് ഗസ്‌നവി, അലാവുദ്ദീന്‍ ഖില്‍ജി, ബാബര്‍, ഔറംഗസേബ് തുടങ്ങിയവരുമായി ബന്ധപ്പെട്ടവരുടെ ചരിത്രം പാഠപുസ്തകങ്ങളില്‍ നിലനിര്‍ത്തേണ്ടതുണ്ടോയെന്ന കാര്യം ആലോചിക്കേണ്ടതുണ്ടെന്നും യോഗി പറഞ്ഞു. അവഗണിക്കപ്പെട്ട ചരിത്രപുരുഷന്മാരെ പാഠ്യപദ്ധതികളില്‍ തിരിച്ചുകൊണ്ടുവരാനെന്ന പേരില്‍ ജനങ്ങളില്‍നിന്നുള്ള നിര്‍ദേശവും സര്‍ക്കാര്‍ ക്ഷണിച്ചിട്ടുണ്ട്.