വളാഞ്ചേരി: കല്യാണമണ്ഡപങ്ങളിലെത്തി കുട്ടികളുടേതടക്കം സ്വര്‍ണാഭരണങ്ങള്‍ മോഷണം നടത്തുന്നയാളെ നാട്ടുകാര്‍ പിടികൂടി പൊലിസിലേല്‍പ്പിച്ചു
തൃപ്പങ്ങോട് ആനപ്പടി സ്വദേശി എറയത്ത് പറമ്പില്‍ ഫൈസലിനെ(35)യാണ് പൊലിസ് അറസ്റ്റു ചെയ്തത്. ഇന്നലെ വളാഞ്ചേരിയിലെ ഒരു ഓഡിറ്റോറിയത്തില്‍ നടന്ന കല്യാണത്തിന് എത്തിയ പ്രതി ചെറിയ കുട്ടിയുടെ ആഭരണം കവര്‍ന്ന് ബസില്‍ കയറി രക്ഷപ്പെടാന്‍ ശ്രമിക്കുന്നതിനിടെ നാട്ടുകാര്‍ പിടികൂടി പൊലിസിന് കൈമാറുകയായിരുന്നു. കല്‍പകഞ്ചേരി പൊലിസ് സ്റ്റേഷനില്‍ ഇയാളുടെ പേരില്‍ സമാനമായ രീതിയില്‍ കേസ് നിലവിലുണ്ട്.
ഇയാളെ പൊലിസ് ചോദ്യം ചെയ്തുവരികയാണ്. പ്രതിയെ തിരിച്ചറിയുന്നവര്‍ സമാനമായ രീതിയില്‍ അനുഭവങ്ങള്‍ ഉണ്ടെങ്കില്‍ പൊലിസിനെ അറിയിക്കണമെന്ന് വളാഞ്ചേരി എസ്.ഐ ബഷീര്‍ ചിറക്കല്‍ അറിയിച്ചു.