വടകര: ദേശീയപാത സ്ഥലമെടുപ്പുമായി നിലനില്‍ക്കുന്ന പ്രശ്‌നങ്ങള്‍ ദേശീയപാത കര്‍മസമിതിയുമായി ജില്ലാ ഭരണകൂടം ചര്‍ച്ചക്കു തയാറാകണമെന്ന് സമരസഹായസമിതി കണ്‍വന്‍ഷന്‍ ആവശ്യപ്പെട്ടു.
കഴിഞ്ഞ എട്ടുവര്‍ഷമായി ജനകീയ സമരങ്ങള്‍ നടത്തുന്ന സംഘടനയെ ഒഴിവാക്കുന്ന നടപടി ജനാധിപത്യവ്യവസ്ഥക്ക് ഭൂഷണമല്ല. സമരം ചെയ്യുന്നവരോട് ചര്‍ച്ച ഇല്ലെന്ന നിലപാട് മാറ്റണമെന്ന് കണ്‍വന്‍ഷന്‍ അഭിപ്രായപ്പെട്ടു. 2016ലെ ഭൂമി വിലയുടെ അടിസ്ഥാനത്തില്‍ മറ്റു ജില്ലകളില്‍ ഭൂമി ഏറ്റെടുക്കുമ്പോള്‍ കോഴിക്കോട് ജില്ലയില്‍ മാത്രം 2007ലെ വില നല്‍കുന്നത് ചതിയാണ്.
മതിയായ നഷ്ടപരിഹാരവും പുനരധിവാസവും നല്‍കാതെ വികസനത്തിനു ശ്രമിച്ചാല്‍ മറ്റൊരു സിംഗൂരായി മാറുമെന്ന് സി.പി.ഐ പ്രതിനിധികള്‍ യോഗത്തില്‍ പറഞ്ഞു. മുപ്പത് മീറ്ററില്‍ നാലുവരി പാത പണിയണമെന്ന് ജനതാദള്‍(യു), ആര്‍.എം.പി, ലീഗ്, വെല്‍ഫെയര്‍പാര്‍ട്ടി പ്രതിനിധികള്‍ പറഞ്ഞു. പുനരധിവാസം ഉറപ്പാക്കി മാത്രമെ വികസനം നടത്താവു എന്ന സി.പി.എം പ്രതിനിധികളും ആവശ്യപ്പെട്ടു. കണ്‍വന്‍ഷനില്‍ കര്‍മസമിതി താലൂക്ക് കണ്‍വീനര്‍ പി.കെ കുഞ്ഞിരാമന്‍ അധ്യക്ഷനായി. പി.കെ ദിവാകരന്‍(സി.പി.എം), ആര്‍ സത്യന്‍(സി.പി.ഐ), അഡ്വ. എം രാജേഷ്(ബി.ജെ.പി), മനയത്ത് ചന്ദ്രന്‍(ജെ.ഡി.യു), കെ. അന്‍വര്‍ ഹാജി(ലീഗ്), ടി.കെ സിബി(ആര്‍.എം.പി), സി.കെ കരീം(നാഷനല്‍ സെക്യുലര്‍ കോണ്‍ഗ്രസ്), വള്ളില്‍ ശ്രീജിത്ത്(കോണ്‍ഗ്രസ് എസ്), എ.ടി ശ്രീധരന്‍(എച്ച്.എം.എസ്), പ്രദീപ് ചോമ്പാല, എ.ടി മഹേഷ്(കര്‍മസമിതി), ടി.കെ മാധവന്‍(വെല്‍ഫെയര്‍പാര്‍ട്ടി), എം. അബ്ദുല്‍ സലാം(വ്യാപാരി വ്യവസായി ഏകോപനസമിതി), കെ. കുഞ്ഞിരാമന്‍, സി.വി ബാലഗോപാല്‍ സംസാരിച്ചു.