വടകര: ഹയര്‍ സെക്കന്‍ഡറി പരീക്ഷയില്‍ പൂത്തൂര്‍ ഗവ. എച്ച്.എസ് സ്‌കൂളിലെ ഹ്യുമാനിറ്റീസ് ബാച്ചിലെ ബെന്നാ ഫാത്തിമ 1200ല്‍ 1200 മാര്‍ക്ക് നേടി അഭിമാനകരമായ നേട്ടം സ്വന്തമാക്കി. പഠനത്തില്‍ മാത്രമല്ല കലാരംഗത്തും മികച്ച വിജയം നേടി ഈ മിടുക്കി ശ്രദ്ധയാകര്‍ഷിച്ചിരുന്നു.
സംസ്ഥാന സ്‌കൂള്‍ കലോത്സവത്തില്‍ സംസ്‌കൃത പ്രസംഗത്തില്‍ എ ഗ്രേഡോടെ ഒന്നാം സ്ഥാനം നേടിയാണ് ബെന്ന താരമായത്. മയ്യന്നൂര്‍ മാപ്പിള സ്‌കൂളിലെ പഠനകാലത്ത് തന്നെ പഠനത്തിലും കലാരംഗത്തും കഴിവ് തെളിയിച്ചിരുന്നു. മുന്‍ ഇന്ത്യന്‍ വോളിബോള്‍ താരം വില്ല്യാപ്പള്ളിയിലെ അബ്ബാസിന്റെയും നസീമയുടെയും മകളാണ് ബെന്ന ഫാത്തിമ.പുത്തൂര്‍ ഗവ. ഹയര്‍ സെക്കന്‍ഡറി സ്‌കൂളില്‍ പരീക്ഷയെഴുതിയ  294 വിദ്യാര്‍ഥികളില്‍ 284 പേര്‍ വിജയിച്ചു. (96.6 ശതമാനം). ഇതില്‍ 27 വിദ്യാര്‍ഥികള്‍ക്ക് മുഴുവന്‍ വിഷയങ്ങളിലും എ പ്ലസ് ലഭിച്ചു.