എ.കെ ഫസലുറഹ്മാന്‍
മലപ്പുറം: സാമ്പത്തിക സംവരണം നടപ്പാക്കിയ സംസ്ഥാന സര്‍ക്കാര്‍ തീരുമാനത്തിന്റെ പശ്ചാത്തലത്തില്‍ മുസ്‌ലിം ലീഗിന്റെ സംസ്ഥാന പ്രവര്‍ത്തക സമിതി യോഗം ഇന്ന് മലപ്പുറത്ത്. സ്വര്‍ണക്കടത്ത്, കേന്ദ്ര ഏജന്‍സികളുടെ അന്വേഷണം, തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് തുടങ്ങിയ രാഷ്ട്രീയ സാഹചര്യങ്ങളും വിലയിരുത്തുന്ന യോഗം നിര്‍ണായകമാണ്. വിവിധ വിഷയങ്ങളില്‍ മുസ്‌ലിം ലീഗ് എടുക്കുന്ന തീരുമാനം ആസന്നമായ തെരഞ്ഞെടുപ്പില്‍ യു.ഡി.എഫിലും നിര്‍ണായകമാണ്.
മലപ്പുറം ലീഗ് ഓഫിസില്‍ കൊവിഡ് മാനദണ്ഡങ്ങള്‍ പാലിച്ചാണ് യോഗം. നേരിട്ട് പങ്കെടുക്കാന്‍ അസൗകര്യമുള്ള പ്രവര്‍ത്തക സമിതി അംഗങ്ങള്‍ ഓണ്‍ലൈന്‍ വഴിയും യോഗത്തില്‍ പങ്കെടുക്കും.

സംവരണത്തില്‍
നിയമനടപടിക്ക്..?
സംസ്ഥാനത്തെ പിന്നോക്ക, ദളിത്, മുസ്‌ലിം വിഭാഗങ്ങള്‍ ഉള്‍പ്പെടെയുള്ളവരുടെ ഭരണഘടനാപരമായ അവകാശങ്ങളും അവസരങ്ങളും ഇല്ലാതാക്കുന്ന മുന്നോക്ക സംവരണത്തിനെതിരേയുള്ള പോരാട്ടത്തില്‍ അല്‍പം പോലും പിന്നോട്ടുപോകേണ്ടതില്ല എന്നാണ് മുസ്‌ലിംലീഗിന്റെ നേതൃതലത്തിലുള്ള ധാരണ. തദ്ദേശ തെരഞ്ഞെടുപ്പിന്റെ മുന്നോടിയായി വിളിച്ചുചേര്‍ത്ത യോഗത്തിലും സംവരണ വിഷയം ചര്‍ച്ച ചെയ്യുന്നതും വിഷയത്തിന്റെ ഗൗരവം കണക്കിലെടുത്താണ്. സംവരണ വിഷയത്തില്‍ കോണ്‍ഗ്രസ് വ്യത്യസ്തമായ നിലപാട് സ്വീകരിച്ച പശ്ചാത്തലത്തില്‍ പരസ്പരമുള്ള കുറ്റപ്പെടുത്തല്‍ ഒഴിവാക്കാന്‍ കഴിഞ്ഞ ദിവസം ഇരുപാര്‍ട്ടി നേതാക്കളും തമ്മില്‍ നടത്തിയ ചര്‍ച്ചയില്‍ ധാരണയായിരുന്നു. സാമ്പത്തിക സംവരണ ബില്‍ ലോക്‌സഭയില്‍ വന്ന സമയത്ത് ശക്തമായ നിലപാടെടുത്ത പാര്‍ട്ടി പിന്നീട് ഇക്കാര്യത്തില്‍ വേണ്ട ഇടപെടല്‍ നടത്തിയില്ലെന്ന നേതൃനിരയിലുള്ള പ്രമുഖര്‍ക്ക് തന്നെ അഭിപ്രായമുണ്ട്.
സംവരണ അട്ടമറിക്കെതിരേ രാഷ്ട്രീയ പോരാട്ടത്തേക്കാള്‍ ഉപരി നിയമ പോരാട്ടം നടത്താന്‍ പാര്‍ട്ടിയിലെ ഒരുവിഭാഗം നിര്‍ദേശിച്ചിട്ടുണ്ട്. നിലവിലെ സംവരണ നഷ്ടം വിലയിരുത്തി മുസ്‌ലിംലീഗ് നേരിട്ടോ അല്ലാതെയോ കോടതിയെ സമീപിക്കാനാണ് ആലോചന. ഇക്കാര്യത്തില്‍ എന്ത് ചെയ്യണമെന്ന കാര്യത്തില്‍ ഇന്നത്തെ യോഗം തീരുമാനമെടുത്തേക്കും.