ചേര്‍ത്തല: പ്രക്യതിക്ഷോഭത്തെ തുടര്‍ന്ന് കേന്ദ്രം കേരളത്തിന് പ്രത്യേകമായി അനുവദിച്ച അരി ഭക്ഷ്യവകുപ്പ് ഏറ്റെടുത്തില്ലെന്ന വാര്‍ത്ത അടിസ്ഥാനരഹിതമെന്ന് ഭക്ഷ്യമന്ത്രി പി. തിലോത്തമന്‍. ഗോഡൗണിന്റെ കുറവു പരിഹരിച്ച് പകരം സംവിധാനം ഓര്‍പ്പെടുത്താന്‍ സമയം വേണമെന്ന ആവശ്യം കേന്ദ്രം അനുവദിച്ചെന്നും ബുധനാഴ്ച വരെ സമയമുണ്ടെന്നും മന്ത്രി പറഞ്ഞു.
കേരളത്തിലെ എം.പിമാര്‍ കേന്ദ്രഭക്ഷ്യമന്ത്രിയുമായുള്ള കൂടികാഴ്ചയിലാണ് പ്രത്യേകം അരി കേരളത്തിന് അനുവദിച്ചത്. എന്നാല്‍ അരിക്ക് പിന്നീട് പണം ഇടാക്കുമെന്ന നില വന്നപ്പോള്‍ കേരളത്തിന്റെ പ്രത്യേകസാഹചര്യത്തില്‍ പണം ഈടാക്കരുതെന്ന് സൂചിപ്പിച്ച് കേന്ദ്രഭക്ഷ്യമന്ത്രിക്ക് താനും പ്രധാനമന്ത്രിക്ക് മുഖ്യമന്ത്രിയും കത്തയച്ചു. മറുപടി വൈകിയപ്പോള്‍ മുഖ്യമന്ത്രി ചികിത്സയ്ക്ക് പോകുന്നതിന്റെ തലേന്നാള്‍ ചേര്‍ന്ന മന്ത്രിസഭാ യോഗത്തില്‍ വിലകൊടുത്താണെങ്കിലും അരി ഏറ്റെടുക്കാന്‍ തീരുമാനിക്കുകയായിരുന്നു.
ഇപ്രകാരം അടുത്ത ദിവസം തന്നെ 30 ശതമാനം അരി ഏറ്റെടുത്ത് കഴിഞ്ഞപ്പോഴാണ് ആറുശതമാനം അരിമാത്രമാണ് ഏറ്റെടുത്തതെന്നും ബാക്കി നഷ്ടമാകുമെന്നും പറഞ്ഞ് വാര്‍ത്തവന്നതെന്ന് മന്ത്രി പറഞ്ഞു. അരി ഏറ്റെടുക്കല്‍ തുടരുകയാണ്. ബുധനഴ്ചയോടെ പൂര്‍ണമായും ഏറ്റെടുടുക്കാനാകുമെന്നാണ് പ്രതീക്ഷ. കേന്ദ്രത്തില്‍നിന്ന് ഇവിടെ എത്തുന്ന അരി സൂക്ഷിച്ചുവെയ്ക്കാനുള്ള ഗോഡൗണുകള്‍ കേരളത്തിന് ആവശ്യത്തിനില്ലയെന്ന യാഥാര്‍ഥ്യം കേന്ദ്രത്തെ ബോധ്യപ്പെടുത്തിയിട്ടുണ്ട്. അരി സൂക്ഷിക്കാനുള്ള മറ്റ് മാര്‍ഗങ്ങള്‍ കണ്ടെത്താനുള്ള ശ്രമം നടക്കുകയാണെന്നും ഭക്ഷ്യ മന്ത്രി പറഞ്ഞു.