റോം: ഇറ്റലിയിലെ അഭയാര്‍ഥി ക്യാംപ് മാഫിയകളുടെ പിടിയില്‍. കേസില്‍ കത്തോലിക്ക പുരോഹിതന്‍ ഉള്‍പ്പെടെ 68 പേരെ അറസ്റ്റ് ചെയ്തു. ക്യാംപിനു പിന്നില്‍ മിഷണറിമാരും കന്യാസ്ത്രീകളും ഉള്‍പ്പെട്ട സംഘം പ്രവര്‍ത്തിച്ചിരുന്നതായും ഇവര്‍ സര്‍ക്കാരിന്റെ സാമ്പത്തിക സഹായം കൈപ്പറ്റിയെന്നും കണ്ടെത്തി. ഇറ്റലിയിലെ ഏറ്റവും വലിയ അഭയാര്‍ഥി ക്യാംപായ അരീന ക്ലാനിലാണ് ക്രമേക്കേട് കണ്ടെത്തിയത്.
പതിറ്റാണ്ടിലേറെയായി ക്യാംപ് മാഫിയകളുടെ കൈകളിലാണെന്ന് പൊലിസ് പറഞ്ഞു. അറസ്റ്റിലായവരില്‍ പ്രാദേശിക പുരോഹിതനും ഉള്‍പ്പെടും. കത്തോലിക് മിസെറികോര്‍ഡിയ അസോസിയേഷന്റെ അധ്യക്ഷനായ ലിയോനാര്‍ഡോ സാക്കോയും അറസ്റ്റിലായി. 1,500 പേരെയാണ് ക്യാംപില്‍ താമസിപ്പിച്ചിരുന്നത്. 100 ദശലക്ഷം യൂറോയുടെ തട്ടിപ്പാണ് ഇവര്‍ നടത്തിയതെന്നാണ് പൊലിസ് പറയുന്നത്. കഴിഞ്ഞ 10 വര്‍ഷത്തെ കണക്കാണിത്. അറസ്റ്റിലായ പുരോഹിതന്‍ എഡ്വാര്‍ഡോ സ്‌കോര്‍ഡിയോ 1.32 ലക്ഷം യൂറോയാണ് ഈ വര്‍ഷം ആത്മീയ സേവനത്തിലായി കൈപ്പറ്റിയതെന്ന് അസിസ്റ്റന്റ് പ്രോസിക്യൂട്ടര്‍ പറഞ്ഞു. അഭയാര്‍ഥികളെ ഇവര്‍ സാമ്പത്തിക നേട്ടത്തിനും മറ്റുമായി ഉപയോഗിച്ചെന്നാണ് കേസ്. 500 ഏജന്റുമാരെയും പൊലിസ് കേസില്‍ തെരയുന്നുണ്ട്. മോഷണം, ആയുധം കൈവശംവയ്ക്കല്‍, മാഫിയാ സംഘം ചേരല്‍, വഞ്ചന തുടങ്ങിയ വിവിധ വകുപ്പുകളാണ് പ്രതികള്‍ക്കെതിരേ ചുമത്തിയത്.
രണ്ട് വര്‍ഷം മുന്‍പ് ക്യാംപിലെ മാഫിയാ പ്രവര്‍ത്തനം ഒരു മാഗസിന്‍ അന്വേഷണാത്മക റിപ്പോര്‍ട്ടിലൂടെ പുറത്തുകൊണ്ടുവന്നിരുന്നു. അഭയാര്‍ഥികളെ ഇവര്‍ പട്ടിണിക്കിട്ട് പീഡിപ്പിച്ചുവെന്നും റിപ്പോര്‍ട്ടുണ്ടായിരുന്നു.