കളനാട്: തീരദേശ മത്സ്യത്തൊഴിലാളികള്‍ കൂടുതലായി ആശ്രയിക്കുന്ന കളനാട് പ്രാഥമികാരോഗ്യ കേന്ദ്രത്തില്‍ ചികിത്സാ സൗകര്യം മെച്ചപ്പെടുത്താന്‍ അടിയന്തിര നടപടി കൈകൊള്ളണമെന്നു മുഖ്യമന്ത്രി ആരോഗ്യ വകുപ്പ് മേധാവിക്കു നിര്‍ദേശം നല്‍കി.
ഇവിടെ ചികിത്സാ സൗകര്യം മെച്ചപ്പെടുത്തണമെന്നാവശ്യപ്പെട്ട് ജനകീയ വികസന സമിതി മുഖ്യമന്ത്രി, ആരോഗ്യ മന്ത്രി, റവന്യൂ മന്ത്രി, ഉദുമ എം.എല്‍.എ എന്നിവര്‍ക്കു നിവേദനം നല്‍കിയിരുന്നു. ഇതേ തുടര്‍ന്നാണു നടപടി.
കുത്തിവയ്പ്പ് എടുക്കാന്‍ സ്ഥിരമായി ഒരു നഴ്‌സിനെയും ലാബും ലാബ് ടെക്‌നിഷ്യനെയും നിയമിക്കുന്നതോടൊപ്പം സ്ത്രീരോഗ ചികിത്സയ്ക്ക് ഒരു ഗൈനക്കോളജിസ്റ്റിനെയും നിയമിക്കാന്‍ അടിയന്തിര നടപടി കൈക്കൊള്ളണമെന്ന് ഇവര്‍ നിവേദനത്തില്‍ ആവശ്യപ്പെട്ടു.
ചെമ്മനാട് പഞ്ചായത്തിലെ 18ാം വാര്‍ഡില്‍ കുന്നരിയത്ത് റെയില്‍വേ തുരങ്കത്തിനു മീതെ സ്ഥിതി ചെയ്യുന്ന ഈ ആശുപത്രിയാണ് മത്സ്യത്തൊഴിലാളികള്‍ക്കും മറ്റു നിര്‍ധന ജനവിഭാഗങ്ങള്‍ക്കുമുള്ള ഏക ആശ്രയം.
നിലവില്‍ സ്ഥിരമായി ഇവിടെ ഡോക്ടര്‍മാര്‍ ഉണ്ടാകാറില്ലെന്നതും രോഗികളെ ഏറെ വലയ്ക്കുന്നു.
വിഷയത്തില്‍ അടിയന്തിര നടപടി കൈകൊള്ളാന്‍ വകുപ്പ് മേധാവിക്കു പരാതി കൈമാറിയിട്ടുണ്ടെന്ന് മുഖ്യമന്ത്രിയുടെ ഓഫിസില്‍ നിന്നു മറുപടി ലഭിച്ചതായി വികസന സമിതി ഭാരവാഹികള്‍ അറിയിച്ചു.