സതാംപ്ടണ്‍: സതാംപ്ടണില്‍ ഇന്ന് വെസ്റ്റ് ഇന്‍ഡീസും ഇംഗ്ലണ്ടും നേര്‍ക്കുനേര്‍ വരുമ്പോള്‍ ഒരുകാര്യം ഉറപ്പിക്കാം. മഴ വില്ലനായി എത്തിയില്ലെങ്കില്‍ പിച്ചില്‍ റണ്‍മഴ പെയ്യും. ഏകദിന ക്രിക്കറ്റിലെ ആദ്യ അഞ്ഞൂറ് സ്‌കോറെന്ന നേട്ടം ഏറ്റവും വേഗത്തില്‍ എത്തിപ്പിടിക്കാനുള്ള വ്യഗ്രതയിലാണോ ഇരു ടീമുമെന്ന് ഇവരുടെ കളി കാണുമ്പോള്‍ തോന്നിയാല്‍ അതില്‍ കുറ്റം പറയാനാകില്ല. ടി-20 ശൈലിയില്‍ ബാറ്റ് വീശുന്ന താരങ്ങളാണ് ഇരു ടീമിന്റെയും പ്രത്യേകത. ഇംഗ്ലണ്ടിനെ മുന്നില്‍ നിന്നു നയിക്കാന്‍ ഓപ്പണര്‍മാരായി ജേസണ്‍ റോയിയും ബൈര്‍സ്‌റ്റോയും മധ്യനിരയില്‍ കൊടുങ്കാറ്റാകാന്‍ ക്യാപ്റ്റന്‍ ഇയാന്‍ മോര്‍ഗനും ജോസ്ബട്‌ലറും. ക്രീസില്‍ വേരുറച്ച് റണ്‍സ് കണ്ടെത്തുന്ന ജോറൂട്ടും സ്വന്തം നാട്ടുകാര്‍ക്ക് ക്രിക്കറ്റ് വിരുന്നൊരുക്കാന്‍ ഇത്രത്തോളം മതി.

മറുഭാഗത്ത് കരീബിയന്‍ കരുത്തുമായി ക്രിസ് ഗെയ്ല്‍. അവസാന ലോകകപ്പ് അവിസ്മരണീയമാക്കാനുറച്ചു തന്നെയാണ് ഗെയ്ല്‍ ഇത്തവണയെത്തിയിരിക്കുന്നത്. വെടിക്കെട്ടിന് തിരി കൊളുത്താന്‍ ഒപ്പം റസ്സലും നിക്കോളസ് പൂരനും ഷായ് ഹോപും. വിക്കറ്റുകള്‍ എറിഞ്ഞിടാന്‍ ഒശാനെ തോമസും ക്യാപ്റ്റന്‍ ജേസണ്‍ ഹോള്‍ഡറും. ക്രിക്കറ്റ് ആരാധകരെ ആവേശം കൊള്ളിക്കാന്‍ മറ്റെന്തു വേണം. മഴക്കാറൊഴിഞ്ഞ തെളിഞ്ഞ വാനത്തിനായി കാത്തിരിക്കാം. സതാംപ്ടണില്‍ പെയ്യാന്‍ പോകുന്ന റണ്‍മഴക്കായി മിഴി തുറക്കാം.