നിലമ്പൂര്‍: ജില്ലയില്‍ വികസനം കൂട്ടണങ്കെില്‍ മലപ്പുറം ജില്ല വിഭജിച്ചേ പറ്റൂവെന്ന് പിവി അന്‍വര്‍ എംഎല്‍എ. ഗവ. കോളജ് സ്‌പെഷ്യല്‍ ഓഫിസറുടെ ഓഫിസ് ഉദ്ഘാടനത്തിനിടെയാണ് ഈ പ്രസ്താവന നടത്തിയത്. വയനാടിന്റെ അതേ പരിഗണന മാത്രമാണ് വലിയ ജില്ലയായ മലപ്പുറത്തിന് കിട്ടുന്നത്.
ഒരു സര്‍ക്കാര്‍ എന്‍ജിനിയറിങ് പോലും ജില്ലയിലില്ലാത്തത് പരിഗണനയുടെ വ്യാപ്തി മനസിലാക്കാവുന്നതാണ്. ജില്ലയില്‍ 60 ലക്ഷം ജനങ്ങളുണ്ട്. 16 എംഎല്‍എമാരും മലപ്പുറം ജില്ലക്ക് സ്വന്തമായുണ്ട്. ഭൂവിസ്തൃതിയിലും ജനസംഖ്യയിലും മുന്നിലായിട്ടുകൂടി കേവലം അഞ്ചുലക്ഷത്തില്‍ താഴെ മാത്രം ജനസംഖ്യയുള്ള വയനാടിനു കൊടുക്കുന്ന അതേപരിഗണനയാണ് ലഭിച്ചുകൊണ്ടിരിക്കുന്നത്.
രോഗപ്രതിരോധ പ്രവര്‍ത്തനങ്ങള്‍ക്കും മറ്റും ലഭിക്കുന്ന തുകയിലും കൂടുതല്‍ പരിഗണനയില്ലെന്നും പിവി അന്‍വര്‍ എംഎല്‍എ പറഞ്ഞു.