കാട്ടാക്കട: ബൈക്കില്‍ കറങ്ങി സ്‌കൂളുകളും കോളജുകളും കേന്ദ്രീകരിച്ച് കഞ്ചാവ് വില്‍ക്കുന്ന യുവാവ് അറസ്റ്റില്‍. വാഴിച്ചല്‍ കൈവന്‍തടത്തില്‍ കുഴിക്കുത്തിയാനില്‍ വീട്ടില്‍ ജിബിന്‍ ജോസാണ് അറസ്റ്റിലായത്.
ഇയാളില്‍ നിന്ന് 1.110 കിലോഗ്രാം കഞ്ചാവും കടത്താനുപയോഗിക്കുന്ന ബൈക്കും പിടിച്ചെടുത്തു. യുവാക്കള്‍ക്കും വിദ്യാര്‍ഥികള്‍ക്കും കഞ്ചാവെത്തിക്കുന്ന സംഘത്തിലെ പ്രധാനിയാണ്. രഹസ്യവിവരം ലഭിച്ചതിനെ തുടര്‍ന്ന് കാട്ടാക്കട എക്‌സൈസ് ബി.ആര്‍ സ്വരൂപും സംഘവും ചേര്‍ന്ന് നടത്തിയ പരിശോധനയിലാണ് ഇയാള്‍ അറസ്റ്റിലായത്. ജിബിന്റെ കൂട്ടാളികളെപ്പറ്റി വ്യക്തമായ വിവരം ലഭിച്ചെന്നും ഇവര്‍ ഉടന്‍ പിടിയിലാകുമന്നും എക്‌സൈസ് ഇന്‍സ്‌പെക്ടര്‍ അറിയിച്ചു.
റെയ്ഡില്‍ അസിസ്റ്റന്റ് എക്‌സൈസ് ഇന്‍സ്‌പെക്ടര്‍ സാം ജോണ്‍സ്, പ്രിവന്റീവ് ഓഫിസര്‍ വി. ഗിരീഷ്, സിവില്‍ എക്‌സൈസ് ഓഫിസര്‍മ്മാരായ ടി. വിനോദ്, ആര്‍. ഹര്‍ഷകുമാര്‍, കെ.ആര്‍ രജിത്ത്, ജെ. സതീഷ് കുമാര്‍ എന്നിവര്‍ സംഘത്തിലുണ്ടായിരുന്നു.