കോഴിക്കോട്: പരിസ്ഥിതിയോട് നീതി പുലര്‍ത്തുക മാത്രമാണു പ്രകൃതി ദുരന്തങ്ങള്‍ തടയാനുള്ള മുഖ്യ പ്രതിരോധമെന്ന് സി.ഡബ്ല്യു.ആര്‍.ഡി.എമ്മിലെ ഗ്രൗണ്ട് വാട്ടര്‍ വിഭാഗം ശാസ്ത്രജ്ഞന്‍ ഇ. അബ്ദുല്‍ ഹമീദ്. പ്രകൃതിയില്‍ അശാസ്ത്രീയ ഇടപെടലും വനം കൈയേറലും എല്ലാം ഇത്തരം ദുരന്തങ്ങള്‍ക്ക് ആക്കം കൂട്ടുമെന്നും അദ്ദേഹം പറഞ്ഞു. പ്രളയാനന്തര കാലാവസ്ഥാ മാറ്റങ്ങളെ കുറിച്ച് ടെലികോം റിക്രിയേഷന്‍ ക്ലബ് കോഴിക്കോട് ജനറല്‍ മാനേജര്‍ ഓഫിസില്‍ നടത്തിയ സെമിനാറില്‍ സംസാരിക്കുകയായിരുന്നു അദ്ദേഹം.
കൂടുതല്‍ മഴ ലഭിച്ച പ്രദേശങ്ങളില്‍ ഉള്ളതിനേക്കാള്‍ ദുരന്തമാണ് കേരളത്തില്‍ ഉണ്ടാകുന്നത്. 1924 ലും ഇപ്പോഴുണ്ടായതിനേക്കാള്‍ ഒരു മാസം നീണ്ടുനില്‍ക്കുന്ന മഴ പെയ്തിട്ടും ഇത്രയേറെ നാശനഷ്ടങ്ങളുണ്ടായിരുന്നില്ല. അന്ന് പ്രകൃതി അതിന്റെ സ്വാഭാവിക രീതിയിലായിരുന്നു. മലമ്പ്രദേശത്തേക്ക് റോഡുകള്‍ നിര്‍മിക്കുമ്പോള്‍ മലവെള്ളം ഒഴുകിപ്പോകാനുള്ള ഓടകള്‍ നിര്‍മിക്കണം. കേരളത്തില്‍ ഉരുള്‍പൊട്ടല്‍ സാധാരണയാണെങ്കിലും കാലാവസ്ഥാ വ്യതിയാനത്തെ തുടര്‍ന്ന് ഇനിയും ദുരന്തങ്ങള്‍ക്ക് സാധ്യത ഏറെയുണ്ട്. അതു മുന്നില്‍ക്കണ്ട് പ്രതിരോധ മാര്‍ഗങ്ങള്‍ സ്വീകരിക്കുകയല്ലാതെ മറ്റു പോംവഴിയില്ല.
സോയില്‍ പൈപ്പിങ് എന്ന പ്രതിഭാസം പലയിടത്തും കാണപ്പെട്ടു. പ്രളയത്തിനു ശേഷമുള്ള ജലാശയങ്ങളിലെ വെള്ളം കുറഞ്ഞ അവസ്ഥ വരള്‍ച്ചയുടെ ഭാഗമായി കാണാനാകില്ലെന്നും പുഴകളുടെ ആഴം വര്‍ധിച്ചതുമൂലമുള്ള ജലനിരപ്പിലെ വ്യതിയാനമാണെന്നും അദ്ദേഹം അഭിപ്രായപ്പെട്ടു. പ്രകൃതിയെ സംരക്ഷിച്ചുകൊണ്ടുള്ള വികസന പ്രവര്‍ത്തനങ്ങള്‍ മാത്രമാണു ദുരന്തങ്ങളില്‍ നിന്ന് രക്ഷനേടാനുള്ള പ്രധാന രക്ഷാകവചം. ശാസ്ത്രീയമായ സംവിധാനങ്ങളെ ഇതിനായി ഉപയോഗപ്പെടുത്തണമെന്നും അദ്ദേഹം പറഞ്ഞു. എസ്.ഡി.ഇ സുമ പി.എം അധ്യക്ഷയായി.