തിരുവനന്തപുരം: സെക്രട്ടേറിയറ്റിന് മുന്നില്‍ സമരം നടത്തുന്ന രീതി ഒഴിവാക്കണമെന്ന് സംസ്ഥാന മനുഷ്യാവകാശ കമ്മിഷന്‍ അധ്യക്ഷന്‍ ജസ്റ്റിസ് ആന്റണി ഡൊമിനിക് ഉത്തരവിട്ടു.

പൊതുജനങ്ങള്‍ക്ക് ബുദ്ധിമുട്ടില്ലാത്തവിധം ശംഖുമുഖം പോലൊരു സ്ഥലത്ത് സമരം നടത്താന്‍ സ്ഥിരംവേദി അനുവദിക്കണം. ഭരണസിരാകേന്ദ്രവും പരിസരവും സമരങ്ങളില്‍നിന്ന് മുക്തമാക്കണം. സെക്രട്ടേറിയറ്റ് പരിസരം സമര മുക്തമാക്കുന്നതുമായി ബന്ധപ്പെട്ട് സംസ്ഥാന പൊലിസ് മേധാവി ആഭ്യന്തര വകുപ്പ് സെക്രട്ടറിക്കയച്ച കത്ത് സര്‍ക്കാര്‍ ഗൗരവമായി പരിഗണിക്കണമെന്നും കമ്മിഷന്‍ ആവശ്യപ്പെട്ടു.

വിവിധ ആവശ്യങ്ങള്‍ക്കായി നാടിന്റെ നാനാഭാഗത്തുനിന്നും നിരവധിയാളുകള്‍ വന്നുചേരുന്ന സ്ഥലമാണ് സെക്രട്ടേറിയറ്റ് പരിസരം. ഇവിടത്തെ നടപ്പാത കൈയേറിയുള്ള സമരങ്ങള്‍ ഗതാഗത തടസമുണ്ടാക്കുന്നുവെന്ന് മാത്രമല്ല സഞ്ചാരസ്വാതന്ത്ര്യം തടസപ്പെടുത്തുകയും ചെയ്യുന്നു. റോഡിലേക്കിറങ്ങി നടക്കേണ്ടിവരുന്നതിനാല്‍ ജനങ്ങളുടെ ജീവനുപോലും ഭീഷണിയാണ്. സമരങ്ങള്‍ അക്രമാസക്തമാകുമ്പോള്‍ സമീപത്തുള്ള സ്ഥാപനങ്ങള്‍ക്കും ഓഫിസുകള്‍ക്കും കെട്ടിടങ്ങള്‍ക്കും കടകള്‍ക്കും നാശനഷ്ടമുണ്ടാകുന്നതായി കമ്മിഷന്‍ ഉത്തരവില്‍ പറഞ്ഞു. ഇത്തരം സന്ദര്‍ഭങ്ങളില്‍ ഭരണസ്തംഭനം തന്നെ ഉണ്ടാകുന്നുണ്ട്. ന്യായമായ ആവശ്യങ്ങള്‍ക്കുവേണ്ടി പ്രതിഷേധങ്ങളും സമരങ്ങളും നടത്തുകയെന്നത് മൗലികാവകാശമാണ്. ഇത് ജനങ്ങളുടെ സഞ്ചാരസ്വാതന്ത്ര്യം തടസപ്പെടുത്തി ആകരുതെന്നും കമ്മിഷന്‍ ഉത്തരവില്‍ പറഞ്ഞു. സെക്രട്ടേറിയറ്റിന് മുന്നില്‍ കുടില്‍കെട്ടി സമരം ചെയ്തവരെ നഗരസഭയുടെ സഹായത്താല്‍ ഫെബ്രുവരി 19ന് ഒഴിപ്പിച്ചതായി ആഭ്യന്തരവകുപ്പ് അഡിഷനല്‍ ചീഫ് സെക്രട്ടറിയും ജില്ലാ പൊലിസ് മേധാവിയും കമ്മിഷനെ അറിയിച്ചു.