റിയാദ്: പുതിയതായി സഊദിയിലെത്തിയ ഇന്ത്യന്‍ അംബാസിഡര്‍ ഡോ. ഔസാഫ് സഈദ് സഊദി ഭരണാധികാരി സല്‍മാന്‍ രാജാവിന് അധികാരപത്രം കൈമാറി. ജിദ്ദ അല്‍സലാം കൊട്ടാരത്തിലാണ് അംബാസിഡര്‍ സല്‍മാന്‍ ബിന്‍ അബ്ദുല്‍ അസീസ് രാജാവിനെ സന്ദര്‍ശിച്ചത്.
ഇന്ത്യയെ കൂടാതെ ഏതാനും രാഷ്ട്ര പ്രതിനിധികളും രാജാവിനെ സന്ദര്‍ശിച്ച് അധികാര പത്രം കൈമാറി. സഊദി അറേബ്യയും തങ്ങളുടെ രാജ്യങ്ങളും തമ്മിലുള്ള ബന്ധം ശക്തമാക്കുന്നതില്‍ വിജയം വരിക്കുന്നതിന് അംബാസിഡര്‍മാര്‍ക്ക് സാധിക്കട്ടെയെന്ന് രാജാവ് ആശംസിച്ചു.

കസാക്കിസ്ഥാന്‍ അംബാസിഡര്‍ ബെരിക് അരിന്‍, ചൈനീസ് അംബാസിഡര്‍ ചെന്‍ വീഖിങ്, അമേരിക്കന്‍ അംബാസിഡര്‍ ജോണ്‍ അബീസൈദ് എന്നിവരാണ് കഴിഞ്ഞ ദിവസം സല്‍മാന്‍ രാജാവിന് അധികാരപത്രങ്ങള്‍ കൈമാറിയ മറ്റു രാജ്യക്കാര്‍.

സഹമന്ത്രി ഡോ. മുസാഅദ് അല്‍ഈബാന്‍, വിദേശ മന്ത്രി ഡോ. ഇബ്രാഹിം അല്‍ അസ്സാഫ്, സഹമന്ത്രിയും റോയല്‍ കോര്‍ട്ട് പ്രസിഡന്റുമായ ഖാലിദ് അല്‍ ഈസ, റോയല്‍ പ്രോട്ടോകോള്‍ വിഭാഗം മേധാവി ഖാലിദ് അല്‍ അബാദ്, റോയല്‍ ഗാര്‍ഡ് മേധാവി ജനറല്‍ സുഹൈല്‍ അല്‍ മുതൈരി, വിദേശ മന്ത്രാലയ അണ്ടര്‍ സെക്രട്ടറി അസ്സാം അല്‍ ഖൈന്‍ എന്നിവര്‍ ചടങ്ങില്‍ സംബന്ധിച്ചു.