ദമാം: സിഐഡി ചമഞ്ഞ് വിദേശികളുടെ താമസ കേന്ദ്രങ്ങളിൽ കയറി ഭീഷണിപ്പെടുത്തി പണം കവർന്ന സംഘം പോലീസ് പിടിയിൽ. കിഴക്കൻ സഊദിയിലെ അൽഖോബാറിലാണ് പോലീസ് അന്വേഷണത്തിൽ മലയാളികളടങ്ങുന്ന സംഘം പിടിയിലായത്. താമസ കേന്ദ്രങ്ങളിൽ കയറി ഭീകരാന്തരീക്ഷം സൃഷ്‌ടിച്ച്‌ സിഐഡി സംഘമാണെന്ന വ്യാജേന വിദേശികളെ ബന്ദികളാക്കി പണം കവർന്ന കേസിൽ നടത്തിയ അന്വേഷണത്തിലാണ് സംഘത്തെ പിടികൂടിയത്. രണ്ടു മലയാളികളെ കൂടാതെ ഒരു സിറിയൻ പൗരനും രണ്ടു സ്വദേശി പൗരന്മാരുമാണ് സംഘത്തിനുണ്ടായിരുന്നത്. കൂടുതൽ പ്രതികൾക്കായി പോലീസ് അന്വേഷണം ശക്തമാക്കിയിട്ടുണ്ട്.

    ഇക്കഴിഞ്ഞ വ്യാഴാഴ്ച രാത്രി 10ന് അൽ ഖോബാർ ഷിമാലിയയയിൽ ഫൈസൽ സ്ട്രീറ്റിലെ എട്ടാംനമ്പർ ക്രോസിനടുത്ത് ഒരു കമ്പനിയിലെ 11 ഓളം തൊഴിലാളികൾ താമസിക്കുന്നിടത്ത് ഉണ്ടായ കവർച്ചാ കേസിലാണ് സംഘം പിടിയിലായത്. രണ്ടു പേർ പോലീസ് വേഷത്തിലും മറ്റുള്ളവർ തോക്ക്‌ ധരിച്ചും ഭീകരാന്തരീക്ഷം സൃഷ്ടിച്ചാണ് ഇവിടെ കവർച്ച നടത്തിയത്. മുറിയിലേക്ക് കടന്നുവന്ന പൊലീസ് വേഷധാരിയുടെ പക്കൽ തോക്കും വിലങ്ങും ഉണ്ടായിരുന്നതിനാൽ ആർക്കും സംശയം തോന്നിയതുമില്ല. . മുറിയിലേക്ക് പ്രവേശിച്ച ഉടനെ തോക്കുചൂണ്ടി വിവിധ മുറികളിൽ ഉണ്ടായിരുന്ന എല്ലാവരേയും ഒരു മുറിയിലാക്കി പൂട്ടി. എല്ലാവരുടേയും ഇഖാമകളും 13 ഫോണുകളും അവർ കൈക്കലാക്കി. ശേഷം മുറികൾ മുഴുവൻ പരിശോധിച്ച സംഘം പലരുടേയും പഴ്‌സുകളിൽ നിന്നായി 10,000 ലധികം റിയാലും കവരുകയായിരുന്നു. അലമാരയിൽ സൂക്ഷിച്ചിരുന്ന പഴയ പാസ്പോർട്ടുകളും ഇവർ കൊണ്ടുപോയി.

     സംഘം റൂം വിട്ടിറങ്ങിയ ശേഷം തൊഴിലാളികൾ സ്പോൺസറുമായി ബന്ധപ്പെട്ടതിനെത്തുടർന്ന് പോലീസ് സ്ഥലത്തെത്തിയപ്പോഴാണ് കവർച്ചയാണെന്നു ബോധ്യമായത്. തുടർന്ന് കേസ് രജിസ്റ്റർ ചെയ്ത പോലീസ് നടത്തിയ അന്വേഷണത്തിൽ രണ്ട് മലയാളികളേയും, ഒരു ഈജിപ്‌ത്‌ പൗരനെയും പൊലീസ് പിടികൂടുകയായിരുന്നു. തട്ടിപ്പിനിരയായവർ പൊലീസ് സ്റ്റേഷനിലെത്തി പ്രതികളെ തിരിച്ചറിഞ്ഞിട്ടുണ്ട്.

     നേരത്തെ ഇവിടെയുണ്ടായിരുന്ന കൊടുവള്ളി സ്വദേശിയിൽ നിന്ന് സമാനമായ രീതിയിൽ സംഘം ഒന്നരലക്ഷം റിയാൽ തട്ടിയെടുത്തിരുന്നു. ഇദ്ദേഹം പ്രവാസം അവസാനിപ്പിച്ച് നാട്ടിലേക്ക് പോയത് അറിയാതെ ഇയാളെ തേടിയാണ് വീണ്ടും സംഘമെത്തിയത്. സംഭവവുമായി ബന്ധപ്പെട്ട് കൂടുതൽ വിവരങ്ങൾ പൊലീസ് പുറത്തുവിട്ടിട്ടില്ല. മറ്റ് രണ്ട് പ്രതികളെ കൂടി പിടികൂടിയാൽ കൂടുതൽ കാര്യങ്ങൾ വ്യക്തമാകുമെന്നാണ് കരുതുന്നത്. സിഐഡി ചമഞ്ഞു തട്ടിപ്പുകൾ നേരത്തെയും നടന്നിരുന്നുവെങ്കിലും മലയാളികൾ പ്രതികളാകുന്നത് ഇതാദ്യമായാണ്.