കൊല്‍ക്കത്ത: എസ്‌കേപ്പ് മാജിക് പാളിപ്പോയതോടെ നദിയില്‍ കാണാതായ മജീഷ്യന്റെ മൃതദേഹം കണ്ടെടുത്തു. പശ്ചിമബംഗാളിലെ ഹൂഗ്ലി നദിയില്‍ മാജിക്ക് അവതരിപ്പിക്കുന്നതിനില്‍ മാന്‍ഡ്രേക്ക് എന്നറിയപ്പെടുന്ന ചഞ്ചല്‍ സര്‍ക്കാരിനെ (40)യാണ് കാണാതായത്.

തന്നെ മുഴുവന്‍ ബന്ധിച്ച് പുഴയില്‍ മുക്കി, നിമിഷങ്ങള്‍ക്കകം പുറത്തുവരുന്നതായിരുന്നു മാജിക്. ഈ രംഗത്ത് വിദഗ്ധനായ ഹാരി ഹൗഡിനി പരീക്ഷിച്ച് വിജയിച്ച വിദ്യ അനുകരിക്കുന്നതിനിടെയാണ് ചഞ്ചല്‍ നദിയില്‍ മുങ്ങി പോയത്.

ഞായറാഴ്ച ഉച്ചയ്ക്ക് 12.30 ഓടെയാണ് ചഞ്ചലിനെ ഹൗറ പാലത്തിന് താഴേക്ക് ക്രെയിനില്‍ താഴ്ത്തിയത്. എന്നാല്‍, ഏറെ നേരത്തിന് ശേഷവും ചഞ്ചലിനെ കാണാത്തതിനെ തുടര്‍ന്ന് കാണികള്‍ പൊലിസിനെ വിവരമറിയിക്കുകയായിരുന്നു. തുടര്‍ന്ന് ദുരന്ത ലഘൂകരണ വിഭാഗവും പൊലിസും ചേര്‍ന്ന് മുങ്ങല്‍ വിദഗ്ധരുടെ സഹായത്തോടെ തെരച്ചില്‍ നടത്തുകയായിരുന്നു. നദിയിലെ ഒഴുക്കില്‍പ്പെടുകയായിരുന്നുവെന്നാണ് നിഗമനം.

മുന്‍പ് ഇയാള്‍ ചെയ്തിരുന്ന മാജിക് പരീക്ഷണങ്ങളെല്ലാം ഏറെക്കുറെ വിജയമായിരുന്നു. 2013 ല്‍ വെള്ളത്തിനടിയിലേക്ക് താഴ്ത്തിയ അഴിക്കൂട്ടില്‍ നിന്ന് രക്ഷപ്പെടുന്ന മാജിക് കാണിച്ചതിന് ഇയാള്‍ക്കെതിരെ നിരവധി വിമര്‍ശനങ്ങള്‍ ഉയര്‍ന്നിരുന്നു. കൂട്ടിലെ രഹസ്യവാതിലൂടെ രക്ഷപ്പെടുന്നത് കണ്ടെന്നാരോപിച്ച് കാഴ്ചക്കാര്‍ ചഞ്ചലിനെ പരിഹസിച്ചിരുന്നു.