തേഞ്ഞിപ്പലം: താഴെചേളാരി അങ്ങാടിയില്‍ ചെട്ടിപ്പടി റോഡരികിലുളള കൂറ്റന്‍ ചീനിമരം യാത്രക്കാര്‍ക്ക് ഭീഷണിയാകുന്നു. ഒരു ഭാഗത്തേക്ക് ചാഞ്ഞു നില്‍ക്കുന്ന മരം കടപുഴകി വീണാല്‍ അതു വന്‍ദുരന്തത്തിന് വഴിവെക്കും. താഴെ ചേളാരിയില്‍ നിന്നു കൂട്ടുമൂച്ചി, ചെട്ടിപ്പടി, പരപ്പനങ്ങാടി, താനാൂര്‍, തിരൂര്‍, ഗുരുവായൂര്‍ ബസുകള്‍ ഇതുവഴിയാണ് കടന്നു പോകുന്നത്.
ഇവിടേക്കുള്ള യാത്രക്കാര്‍ ബസ് കാത്തു നില്‍ക്കുന്നത് ഈ മരച്ചുവട്ടിലാണ്. താഴെ ചേളാരിയില്‍ നിന്നു തയ്യിലക്കടവ്, കൂട്ടുമൂച്ചി ഭാഗങ്ങളിലേക്ക് യാത്രക്കാരുമായി സര്‍വീസ് നടത്തുന്ന ജീപ്പുകള്‍ യാത്രക്കാരെ കയറ്റാന്‍ വേണ്ടി പാര്‍ക്ക് ചെയ്യുന്നതും ഇവിടെയാണ്.
വാഹനം കാത്തു നില്‍ക്കുന്നവര്‍ക്ക് പുറമേ തൊട്ടടുത്തുള്ള പീടിക മുറികള്‍ക്കും മരം ഭീഷണിയായിട്ടുണ്ട്. മരത്തിന്റെ ചായ്‌വും സമീപത്തെ കെട്ടിടത്തിന് മുകളിലേക്കാണ്.
വെളിമുക്ക് എ.യു.പി സ്‌കൂളിലെ വിദ്യാര്‍ഥികളും വഴിനടക്കുന്നത് അപകടമാംവിധം ചാഞ്ഞു നില്‍ക്കുന്ന ഈ മരച്ചുവട്ടിലൂടെയാണ്. യാത്രക്കാര്‍ക്ക് ഭീഷണിയായ ഈ ചീനിമരം മുറിച്ച് മാറ്റാനുള്ള നടപടികള്‍ അധികൃതര്‍ സ്വീകരിക്കണമെന്ന ആവശ്യം ശക്തമാണ്.