റിയാദ്: അമേരിക്കൻ പ്രസിഡന്റ് തിരഞ്ഞെടുപ്പിൽ വിജയിച്ച ജോ ബൈഡനെ അഭിനന്ദിച്ച് സഊദി ഭരണാധികാരികൾ. കൂടുതല്‍ വിജയം കൈവരിക്കാനും അമേരിക്കന്‍ ജനതക്ക് ക്ഷേമം സമ്മാനിക്കാനും സാധിക്കട്ടെയെന്ന് രാജാവ് സൽമാൻ ബിൻ അബ്ദുൽ അസീസ് രാജാവും കിരീടവകാശി മുഹമ്മദ് ബിൻ സൽമാൻ രാജകുമാരനും ആശംസിച്ചു. രണ്ട് സുഹൃദ് രാജ്യങ്ങള്‍ തമ്മില്‍ നിലനില്‍ക്കുന്ന അടുത്ത ബന്ധത്തെ  സല്‍മാന്‍ രാജാവ് പ്രകീര്‍ത്തിച്ചു.  

      അമേരിക്കൻ ജനത കൂടുതൽ പുരോഗതിയും സമൃദ്ധിയും നൽകാൻ ഇവർക്ക് കഴിയട്ടെയെന്ന് സൽമാൻ രാജാവ് ടെലഗ്രാം സന്ദേശത്തിൽ ആശംസിച്ചു. വൈസ് പ്രസിഡന്റ് കമലാ ഹാരിസിനെയും ഇരുവരും അഭിനന്ദിച്ചു.

     അമേരിക്കന്‍ പ്രസിഡന്‍റ് തെരഞ്ഞെടുപ്പില്‍ വിജയിച്ച ജോ ബൈഡനും വൈസ് പ്രസിഡന്‍റ് കമലാ ഹാരിസിനും വിവിധ ഗൾഫ്, അറബ് ഭരണാധികാരികൾ അഭിനന്ദനങ്ങൾ അർപ്പിച്ചു. അബുദാബി കിരീടാവകാശി മുഹമ്മദ് ബിൻ സായിദ് അൽ നഹ്‌യാൻ, ജോർദാൻ ഭരണാധികാരി കിംഗ് അബ്ദുള്ളാഹ് ബിൻ അൽ ഹുസൈൻ, ഖത്തര്‍ അമീര്‍ ശൈഖ് തമീം അല്‍ത്താനി, കുവൈത്ത് അമീർ ശൈഖ് നവാഫ് അൽ അഹ്മദ് അൽ ജാബിർ അസ്സബാഹ്,

     ഒമാൻ ഭരണാധികാരി സുൽത്താൻ ഹൈതം ബിൻ താരിഖ്, ബഹ്റൈൻ രാജാവ് ഹമദ് ബിൻ ഈസ അൽ ഖലീഫ, പ്രധാനമന്ത്രി പ്രിൻസ് ഖലീഫ ബിൻ സൽമാൻ അൽ ഖലീഫ, ഇറാഖ് പ്രസിഡന്റ് ബർഹാം സാലിഹ്, ലബനോൻ പ്രസിഡന്റ് മൈക്കൽ ഔൻ, ഈജിപ്ത് പ്രസിഡന്റ് അബ്ദിൽ ഫത്താഹ് അൽ സീസി, സുഡാൻ പ്രധാനമന്ത്രി അബ്ദുല്ലാഹ് ഹംദോക് എന്നിവരും തിരഞ്ഞെടുക്കപ്പെട്ട അമേരിക്കൻ പ്രസിഡന്റ് ജോ ബൈഡന് ആശംസകളും അഭിനന്ദനങ്ങളും അറിയിച്ചു.