തിരുവന്തപുരം: ആന്തൂര്‍ നഗരസഭ അധികൃതരുടെ അനാസ്ഥമൂലം പ്രവാസി വ്യവസായി ആത്മഹത്യ ചെയ്‌തെന്ന പരാതി ഉയര്‍ന്ന സാഹചര്യത്തില്‍ വിശദീകരണംതേടി സര്‍ക്കാര്‍. പ്രവാസിയായിരുന്ന സാജന്റെ മരണത്തില്‍ പ്രതിക്കൂട്ടിലായ ആന്തൂര്‍ നഗരസഭയിലെ ഉന്നത ഉദ്യോഗസ്ഥരെ വ്യവസായമന്ത്രി എ.സി മൊയ്തീന്‍ തിരുവനന്തപുരത്തേക്ക് വിളിപ്പിച്ചു.
നഗരസഭാ സെക്രട്ടറി, ഓവര്‍സിയര്‍, മുന്‍സിപ്പല്‍ എന്‍ജിനീയര്‍ എന്നീ ഉദ്യോഗസ്ഥരെയാണ് മന്ത്രി അടിയന്തരമായി തലസ്ഥാനത്തേക്ക് വിളിപ്പിച്ചത്. സാജന്റെ ഓഡിറ്റോറിയവുമായി ബന്ധപ്പെട്ട മുഴുവന്‍ ഫയലുകളുമായി ഈ ഉദ്യോഗസ്ഥര്‍ തിരുവനന്തപുരത്ത് എത്തിയിട്ടുണ്ട്.

കഴിഞ്ഞ ദിവസം സാജന്റെ ഭാര്യയും ബന്ധുക്കളും നഗരസഭാ അധ്യക്ഷ പി.കെ ശ്യാമളക്കെതിരേ രംഗത്തെത്തിയിരുന്നു. ഇവരുടെ വ്യക്തിവിരോധം മൂലം ഫയലില്‍ ഒപ്പിട്ട് നല്‍കാന്‍ വൈകിയതോടെ ഉദ്ഘാടനം അനന്തമായി നീണ്ടതുകൊണ്ടാണ് സാജന്‍ ആത്മഹത്യ ചെയ്തതെന്നായിരുന്നു ഭാര്യയുടെയും ബന്ധുക്കളുടെയും ആരോപണം. സി.പി.എം ഒറ്റയ്ക്ക് ഭരിക്കുന്ന ആന്തൂര്‍ നഗരസഭയില്‍ മരുന്നിനുപോലും പ്രതിപക്ഷ അംഗളില്ല. സി.പി.എം കേന്ദ്രക്കമ്മിറ്റി അംഗം എം.വി ഗോവിന്ദന്‍ മാസ്റ്ററുടെ ഭാര്യ പി.കെ ശ്യാമളയാണ് നഗരസഭ അധ്യക്ഷ.