പയ്യന്നൂര്‍: എക്‌സൈസ് കമ്മിഷണര്‍ ഋഷിരാജ് സിങ് എക്‌സൈസ് പയ്യന്നൂര്‍ റെയ്ഞ്ച് ഓഫിസില്‍ പരിശോധന നടത്തി. ജില്ലയിലെ എക്‌സൈസ് വകുപ്പ് കാര്യക്ഷമമാക്കുന്നതിനും ലഹരി ഉല്‍പ്പന്നങ്ങളുടെ വില്‍പ്പന, കടത്തല്‍ എന്നിവ കര്‍ശനമായി നിരോധിക്കുന്നതിന്റെയും ഭാഗമായാണ് പരിശോധന. വ്യാജമദ്യത്തിന്റെ വില്‍പ്പന തടയാന്‍ കര്‍ശന നടപടി സ്വീകരിക്കണമെന്നും മെഡിക്കല്‍ സ്റ്റോര്‍ വഴിയുള്ള മയക്കുമരുന്ന് ഗുളികകള്‍ വില്‍ക്കുന്നതിനെതിരേ ശക്തമായ പരിശോധന നടത്തണമെന്നും ഉദ്യോഗസ്ഥര്‍ക്ക് നിര്‍ദേശം നല്‍കി. ഇന്നലെ രാവിലെ പയ്യന്നൂരിലെ എക്‌സൈസ് ഉദ്യോഗസ്ഥര്‍ പിടികൂടിയ പുകയില ഉല്‍പ്പന്നങ്ങള്‍ അദ്ദേഹം പരിശോധിച്ചു. ഡെപ്യൂട്ടി കമ്മിഷണര്‍ വി.വി സുരേന്ദ്രന്‍, എക്‌സൈസ് ഇന്‍സ്‌പെക്ടര്‍ കെ.വി വാസുദേവന്‍, പ്രിവന്റീവ് ഓഫിസര്‍ ടി. സന്തോഷ് എന്നിവരും ഒപ്പമുണ്ടായി.