പോങ്യാങ്: ചൈനയുമായി തങ്ങള്‍ക്ക് ഉറച്ച ബന്ധമാണുള്ളതെന്ന് ഉത്തരകൊറിയന്‍ ഭരണാധികാരി കിം ജോങ് ഉന്‍. ചൈനീസ് പ്രസിഡന്റ് ഷി ജിന്‍പിങ്ങിന്റെ ഉ.കൊറിയന്‍ സന്ദര്‍ശനത്തിനിടെയായിരുന്നു കിമ്മിന്റെ പ്രഖ്യാപനം. തങ്ങളുടെ ഉറച്ച സുഹൃദ് ബന്ധം പ്രകടിപ്പിക്കാനുള്ള സുപ്രധാന അവസരമാണ് ജിന്‍പിങ്ങിന്റെ സന്ദര്‍ശനത്തിലൂടെ സാധ്യമായതെന്ന് അദ്ദേഹം പറഞ്ഞു. ആണവ നിര്‍വ്യാപനത്തിനായുള്ള ഉ.കൊറിയയുടെ ശ്രമങ്ങളെ ജിന്‍പിങ് പുകഴ്ത്തി.
യു.എസും ഉ.കൊറിയയും ചര്‍ച്ച തുടരുമെന്നാണ് പ്രതീക്ഷയെന്ന് അദ്ദേഹം വ്യക്തമാക്കി. 14 വര്‍ഷത്തിന് ശേഷമാണ് ചൈനീസ് പ്രസിഡന്റ് ഉ.കൊറിയ സന്ദര്‍ശിക്കുന്നത്. രണ്ട് ദിവസത്തെ സന്ദര്‍ശനത്തിന് ശേഷം ജിന്‍പിങ് ചൈനയിലേക്ക് തന്നെ തിരിച്ചു. സന്ദര്‍ശനത്തിന് ഉ.കൊറിയന്‍ ദേശീയ മാധ്യമമായ കെ.സി.എന്‍.എ വന്‍ പ്രധാന്യമാണ് നല്‍കിയത്. ജപ്പാനില്‍ ജി20 ഉച്ചകോടിക്ക് മുന്നോടിയായാണ് ചൈനീസ് പ്രസിഡന്റിന്റെ സന്ദര്‍ശനം. ഉച്ചകോടിയില്‍ യു.എസ് പ്രസിഡന്റ് ഡൊണാള്‍ഡ് ട്രംപുമായി ജിന്‍പിങ് കൂടിക്കാഴ്ച നടത്തും.