മലപ്പുറം: കാലിക്കറ്റ് സര്‍വകലാശാലയിലെ ഒഴിവുകളില്‍ ബാക്ക് ലോഗ് നികത്താതെയും സംവരണം അട്ടിമറിച്ചുമുള്ള നിയമന നീക്കം തുടരുന്നു. ന്യൂനപക്ഷ പിന്നോക്ക വിഭാഗങ്ങളുടെ ബാക്ക് ലോഗ് നികത്താതെയും സംവരണം പറയാതെയുമുള്ള നിയമന നീക്കവും ചോദ്യം ചെയ്ത് സമര്‍പ്പിച്ച കേസ് ഹൈക്കോടതിയുടെ പരിഗണനയിലിരിക്കെയാണ് കൂടുതല്‍ വിഭാഗങ്ങളില്‍ അപേക്ഷകളുടെ ചുരുക്കപ്പട്ടിക പ്രസിദ്ധീകരിച്ച് ഇഷ്ടക്കാരെ നിയമിക്കാനുള്ള നീക്കം തുടരുന്നത്. കഴിഞ്ഞ ഡിസംബറിലാണ് 116 അസിസ്റ്റന്റ് പ്രൊഫസര്‍, അസോസിയേറ്റ് ഫ്രൊഫസര്‍, പ്രൊഫസര്‍ തസ്തികകളിലേക്ക് സര്‍വകലാശാല അപേക്ഷ ക്ഷണിച്ചത്. അസിസ്റ്റന്റ് ഫ്രൊഫസര്‍ 63, അസോസിയറ്റ് പ്രൊഫസര്‍ 29, പ്രൊഫസര്‍ 24 എന്നിങ്ങനെയാണ് ഒഴിവുകളുള്ളത്.
സര്‍വകലാശാലയുടെ അധ്യാപക തസ്തികകളില്‍ പിന്നോക്ക സംവരണ വിഭാഗങ്ങള്‍ക്ക് അര്‍ഹതപ്പെട്ട അന്‍പതോളം ബാക്ക് ലോഗുകളാണ് നികത്താതെ കിടക്കുന്നത്. അസിസ്റ്റന്റ് പ്രൊഫസര്‍ തസ്തികയില്‍ മാത്രം 33 ഒഴിവുകളാണ് പിന്നോക്കക്കാരുടെ ബാക്ക് ലോഗായി (എന്‍.സി.എ) കിടക്കുന്നത്. ഇതുസംബന്ധിച്ച് ബന്ധപ്പെട്ട സെക്ഷന്‍ ഉദ്യോഗസ്ഥര്‍ വൈസ് ചാന്‍സലര്‍ക്ക് റിപ്പോര്‍ട്ട് സമര്‍പ്പിച്ചിരുന്നെങ്കിലും ബാക്ക് ലോഗ് നികത്തേണ്ടെന്ന് സിന്‍ഡിക്കേറ്റ് ഉപസമതി തീരുമാനിക്കുകയായിരുന്നു. സര്‍വകലാശാലകളുടെ വിവിധ പഠന വകുപ്പുകളില്‍ വിവിധ കേഡറുകളിലെ തസ്തികകള്‍ പൂള്‍ ചെയ്ത് നിയമനം നടത്തണമെന്ന് സര്‍ക്കാര്‍ 2013 ല്‍ ഓഡിനന്‍സ് ഇറക്കിയിരുന്നു. ഈ ഓഡിനന്‍സ് കേരള സര്‍വിസ് റൂള്‍സ് സംവരണ കാര്യത്തില്‍ പാലിക്കണമെന്ന് പ്രത്യേകം നിര്‍ദേശവുമുണ്ടായിരുന്നു. എന്നാല്‍ ഓഡിനന്‍സും സര്‍വിസ് റൂളും മറികടന്നാണ് ഈ സംവരണ അട്ടിമറി. ബാക്ക് ലോഗ് പരിഗണിക്കാതെ നടത്തുന്ന നിയമനങ്ങള്‍ക്ക് നിയമ സാധുതയില്ലെന്ന് സുപ്രിംകോടതിയും നേരത്തെ വ്യക്തമാക്കിയിരുന്നു.