വിജയവാഡ: ഒരൊറ്റ എം.എല്‍.എമാര്‍പോലും ഇല്ലാത്ത ആന്ധ്രാപ്രദേശില്‍ ചുവടുറപ്പിക്കാന്‍ ഓപ്പറേഷന്‍ താമരയുമായി ബി.ജെ.പി. മുന്‍മുഖ്യമന്ത്രി എന്‍. ചന്ദ്രബാബു നായിഡുവിന്റെ പാര്‍ട്ടിയായ ടി.ഡി.പിയില്‍ നിന്ന് എം.എല്‍.എമാരെ അടര്‍ത്തി മാറ്റി ഓപ്പറേഷന്‍ താമരയിലൂടെ ബി.ജെ.പി പക്ഷത്തേക്ക് എത്തിക്കാനാണ് നീക്കം നടക്കുന്നതെന്നാണ് വിവരം.

കൂറുമാറ്റ നിരോധന നിയമം മറികടക്കുന്നതിനായി മൂന്നില്‍ രണ്ട് അംഗങ്ങളെ കൂട്ടത്തോടെ ചുവടുമാറ്റാനാണ് ബി.ജെ.പി ശ്രമിക്കുന്നത്. കര്‍ണാടകയില്‍ പരീക്ഷിച്ചെങ്കിലും അത് ചുണ്ടിനും കപ്പിനുമിടയില്‍ പരാജയപ്പെട്ടുപോയെങ്കിലും പ്രതീക്ഷ കൈവിടാതെ ആന്ധ്രയില്‍ തങ്ങളുടെ ഉദ്യമം പരീക്ഷിക്കുകയാണ് ബി.ജെ.പി.ടി.ഡി.പിക്ക് നിലവില്‍ 23 എം.എല്‍.എമാരാണ് നിയമസഭയില്‍ ഉള്ളത്.
ഇവരില്‍ 15 പേരെയെങ്കിലും ബി.ജെ.പിയിലേക്ക് എത്തിച്ചാല്‍ കൂറുമാറ്റ നിരോധന നിയമത്തിന്റെ പരിധിയില്‍ നിന്ന് ഒഴിവാകും. പ്രായോഗിക തലത്തില്‍ ഇത് അത്ര എളുപ്പമല്ലെങ്കിലും ചിലര്‍ തങ്ങളെ സമീപിച്ചിട്ടുണ്ടെന്നാണ് ബി.ജെ.പി പറയുന്നത്.

ഇതിനിടയില്‍ ടി.ഡി.പി വിശാഖപട്ടണം എം.എല്‍.എയും മുന്‍മന്ത്രിയുമായ ജി. ശ്രീനിവാസ റാവുവിന്റെ നേതൃത്വത്തില്‍ ചിലര്‍ ബി.ജെ.പിയിലേക്ക് ചുവടുമാറ്റിയേക്കുമെന്ന വാര്‍ത്തയും പ്രചരിക്കുന്നുണ്ട്. അടുത്തിടെ തെലങ്കാനയില്‍ ടി.ആര്‍.എസ് സ്വീകരിച്ച അതേ രീതിയിലുള്ള തന്ത്രമാണ് ആന്ധ്രയില്‍ ബി.ജെ.പി സ്വീകരിക്കുന്നത്. 18 കോണ്‍ഗ്രസ് എം.എല്‍.എമാരില്‍ 12പേരെയും കൂറുമാറ്റ നിരോധന നിയമത്തിന്റെ പരിധിയില്‍ നിന്ന് രക്ഷപ്പെടുത്തി ടി.ആര്‍.എസ് പക്ഷത്തേക്ക് എത്തിച്ചത് മുഖ്യമന്ത്രി ചന്ദ്രശേഖര റാവുവിന്റെ ആസൂത്രിത നീക്കമായിരുന്നു. ഇതേ രീതിയാണ് ആന്ധ്രയില്‍ ബി.ജെ.പി പരീക്ഷിക്കുന്നത്.

കഴിഞ്ഞ നിയമസഭാ തെരഞ്ഞെടുപ്പില്‍ ആന്ധ്രയില്‍ ഒരു സീറ്റില്‍പോലും വിജയിക്കാന്‍ ബി.ജെ.പിക്ക് ആയിട്ടില്ല. എന്നാല്‍ മത്സരിക്കാതെ എം.എല്‍.എമാരെ എങ്ങനെ ഉണ്ടാക്കാമെന്നാണ് ഓപ്പറേഷന്‍ താമരയിലൂടെ പാര്‍ട്ടി നേതൃത്വം ലക്ഷ്യം വയ്ക്കുന്നത്. ഏതാനും ദിവസങ്ങള്‍ക്ക് മുന്‍പാണ് ടി.ഡി.പിയുടെ രാജ്യസഭാ എം.പിമാരെ ബി.ജെ.പി തട്ടിയെടുത്തത്. ഇതിനു പിന്നാലെയാണ് എം.എല്‍.എമാരെയും സ്വാധീനിക്കാനുള്ള നീക്കം ബി.ജെ.പി സജീവമാക്കിയത്.