ബ്യൂണസ്‌ഐറിസ്: ദക്ഷിണ അമേരിക്ക ലോകകപ്പ് യോഗ്യതാ മത്സരത്തില്‍ കരുത്തരായ അര്‍ജന്റീനയെ പരാഗ്വെ 1-1ന് സമനിലയില്‍ തളച്ചു. അര്‍ജന്റീനയുടെ തട്ടകത്തില്‍ നടന്ന മത്സരത്തില്‍ ആദ്യം വല കുലുക്കിയത് പരാഗ്വെ ആയിരുന്നു. 21ാം മിനുട്ടില്‍ ലഭിച്ച പെനാല്‍റ്റി വലയിലാക്കി ഏഞ്ചല്‍ റൊമീറോയാണ് പരാഗ്വെയെ മുന്നിലെത്തിച്ചത്.

41ാം മിനുട്ടില്‍ നിക്കോളാസ് ഇവാന്‍ ഗോണ്‍സാലസാണ് അര്‍ജന്റീനയ്ക്കായി തിരിച്ചടിച്ചത്. 58ാം മിനുട്ടില്‍ ലയണല്‍ മെസ്സി അര്‍ജന്റീനയ്ക്കായി വല കുലുക്കിയെങ്കിലും വാര്‍ പരിശോധനയില്‍ ഫൗളാണെന്ന് കണ്ടെത്തിയതിനെത്തുടര്‍ന്ന് ഗോള്‍ നിഷേധിക്കപ്പെട്ടു. പിന്നീടുള്ള അര്‍ജന്റീനയുടെ ശ്രമങ്ങളെല്ലാം മികച്ച പ്രതിരോധം തീര്‍ത്ത് പരാഗ്വെ തടുത്തതോടെ സമനിലയോടെ മെസ്സിക്കും സഹതാരങ്ങള്‍ക്കും കളം വിടേണ്ടി വന്നു. ഇടവേളയ്ക്ക് ശേഷം ഏഞ്ചല്‍ ഡി മരിയ അര്‍ജന്റീനയ്ക്കായി കളത്തിലിറങ്ങിയെങ്കിലും കാര്യമായൊന്നും ചെയ്യാനായില്ല.

മാര്‍ട്ടിനസിനെ കുന്തമുനയാക്കി 3-4-2-1 ഫോര്‍മേഷനില്‍ അര്‍ജന്റീന ഇറങ്ങിയപ്പോള്‍ 4-3-3 ഫോര്‍മേഷനാണ് പരാഗ്വെ പിന്തുടര്‍ന്നത്. ആദ്യ രണ്ട് മത്സരവും ജയിച്ച അര്‍ജന്റീനയുടെ ആദ്യ സമനിലയാണിത്. 3 മത്സരത്തില്‍ നിന്ന് 7 പോയിന്റുമായി അര്‍ജന്റീനയാണ് പോയിന്റ് പട്ടികയില്‍ ഒന്നാമത്. മൂന്ന് മത്സരത്തില്‍ രണ്ട് സമനിലയും ഒരു ജയവും നേടിയ പരാഗ്വെ നാലാം സ്ഥാനത്തുമാണ്.